სინოდი სკოლებში ახალი საგნის "მე და საზოგადოება" შეტანამდე, განხილვების მოწყობას ითხოვს

საზოგადოება - 17:07, 25 May, 2015

3753

მართლმადიდებელი ეკლესიის წმინდა სინოდის დღევანდელ სხდომაზე განათლების სამინისტროს ახალი პროექტი განიხილეს, რომლის დანერგვასაც უწყება უახლოეს მომავალში აპირებს. საქმე ეხება სკოლებში ახალი საგნის "მე და საზოგადოება"-ს სწავლებას. პროექტის ფარგლებში, მესამე, მეოთხე და მეექვსე კლასელებისთვის სკოლებში ახალი სახელმძღვანელოები შემოდის. აღნიშნულ თემაზე მედიასთან ფოთისა და ხობის მიტროპოლიტმა მეუფე გრიგოლმა (ბერბიჭაშვილი) ისაუბრა.
საპატრიარქო ახალი საგნის სკოლებში შეტანამდე, ამ პროექტის ეკლესიის, საზოგადოებისა და რელიგიური ორგანიზაციების მონაწილეობით განხილვას ითხოვს:

„ერთ-ერთი საკითხი შეეხებოდა განათლების სფეროში არსებულ საკითხებს. მოგეხსენებათ, რომ უკანასკნელ წლებში არაერთი რეფორმა განხორციელდა განათლების სფეროში. დიდი ყურადღება ეთმობა ცოდნის ამაღლებას, მაგრამ აღინიშნა, რომ ამასთან ერთად, უმნიშვნელოვანესია აღზრდის საკითხი, რომ მეტი ყურადღება უნდა დაეთმოს ამას. შესაბამისად, არის საუბარი ახალ პროექტზე, რომლის დანერგვასაც აპირებს განათლების სამინისტრო. იქნება ახალი სახელმძღვანელოები მე-3, მე-4 და მე-6 კლასელებისთვის. „მე საზოგადოება“ და „მე და სამშობლო“. გამოითქვა სურვილი, რომ განათლების სამინისტრომ, ვიდრე იგი დანერგავს ამ საგანს სასწავლო პროგრამაში, უნდა მოხდეს ამ პროექტის განხილვა, როგორც ეკლესიის, ასევე, საზოგადოებისა და რელიგიური ორგანიზაციების მონაწილეობით, ფართო საზოგადოების ჩართვით ამ პროგრამაში და შესაბამისად, ეს სახელმძღვანელოები გამიზნულია სწორედ ამ მიმართულებით, რომ აღზრდის თემას ყურადღება დაეთმოს, მაგრამ რჩება მთელი რიგი საკითხები, რომლებიც პასუხისგაცემას ითხოვს. ასევე, ითქვა, რომ განათლების კანონში საუბარია ეროვნულ ღირებულებზე და სურვილი გამოითქვა, რომ განიმარტოს, რას ვგულისხმობთ ეროვნულ ღირებულებებში. უფრო მეტი კონკრეტიკა რომ იყოს, რადგან ზედმეტი კითხვის ნიშნები აქაც არ არსებობდეს“, - განაცხადა მეუფე გრიგოლმა.

წმინდა სინოდის სხდომა საქართველოს საპატრიარქოში რამდენიმე საათის განმავლობაში მიმდინარეობდა. სხდომაზე სხვადასხვა საკითხები განიხილეს. სხდომის განჩინება „საპაქატრიარქოს უწყებანში“ გამოქვეყნდება.