"თიბისი ჯგუფის" ხელმძღვანელი მამუკა ხაზარაძე ლარის კურსის გაუფასურებას ეხმაურება და ბანკების შეთქმულებასთან დაკავშირებით გაკეთებულ განცხადებებს პასუხობს.

როგორც ხაზარაძე გაზეთ „კვირის პალიტრასთან“ საუბარში აცხადებს, კომერციულ ბანკებთან დაკავშირებით გაკეთებული ნეგატიური განცხადებები საფუძველს მოკლებულია.

მისი განცხადებით, თუ საბანკო სისტემის რეპუტაცია შეირყა, ქართული ეკონომიკის თითქმის ყველა სფერო შეირყევა.

"კომერციულ ბანკებთან დაკავშირებით მოვისმინე მოსაზრება ბანკების შეთქმულების თეორიაზე. ლარის კურსის გაუფასურებამ ჩვენი ბანკის ინვესტორებს 250 მილიონი დოლარი დააკარგვინა. საუბარი მაქვს აქციონერებზე, რომლებიც შარშან შემოუერთდნენ ლონდონის საფონდო ბირჟაზე "თიბისი ბანკის" აქციების განთავსებას. მეორე მხრივ, ლარის კურსის გაუფასურება პირდაპირ იწვევს საკრედიტო პორტფელის გაფუჭებას და აისახება ბანკის როგორც გრძელვადიან, ისე მოკლევადიან მომგებიანობაზე. ხდება სესხების რესტრუქტურიზაცია, რადგან მოქალაქეები ვერ ახერხებენ იმ სესხის დაფარვას, რომელიც, მაგალითად, დოლარში ჰქონდათ აღებული.. ექსპერტების განცხადებები ლარის გაუფასურებაში ეროვნულ ბანკთან ერთად კომერციული ბანკების დადანაშაულების შესახებ პოპულისტური და არაკორექტულია. 24 წელია, ამ სფეროში ვარ და სიმართლე გითხრათ, ბანკებზე ასეთი განცხადებებიც პირველად მესმის. ამერიკაში რომ რაღაც მოხდა, არ ნიშნავს, რომ ამას აუცილებლად გადმოიღებდნენ საქართველოში. ეს სერიოზული ბრალდებაა და, ცოტა არ იყოს, შეურაცხმყოფელიც",-ამბობს მამუკა ხაზარაძე.