თერჯოლის მუნიციპალიტეტს განახლებული ნაგავსაყრელი მოემსახურება

საზოგადოება - 13:33, 23 May, 2015

1129

თერჯოლაში მუნიციპალური ნაგავსაყრელის კეთილმოწყობა დასრულდა. ჩატარებული სამშენებლო-სამონტაჟო სამუშაოები დღეს რეგიონული განვითარებისა და ინფრასტრუქტურის სამინისტროს „საქართველოს მყარი ნარჩენების მართვის კომპანიის“ დირექტორმა, გიორგი შუხოშვილმა თერჯოლის მუნიციპალიტეტის მოსახლეობასთან ერთად დაათვალიერა.

ნაგავსაყრელი, რომლის ფართობიც 42639.50 კვადრატულ მეტრს მოიცავს 2007 წლიდან ფუნქციონირებს. პოლიგონზე ყოველდღიურად თერჯოლის მუნიციპალიტეტიდან და მისი მიმდებარე სოფლებიდან 15 მ³ ნარჩენი შედის.

თერჯოლის მუნიციპალური ნარჩენების ნაგავსაყრელი „საქართველოს მყარი ნარჩენების მართვის კომპანიას“ საკუთრებაში 2013 წლის 10 მაისს გადაეცა. იმ დროისთვის პოლიგონი სტანდარტების შეუსაბამოდ ოპერირებდა. ნარჩენების შეტანა ხდებოდა არაორგანიზებულად. ნაგავსაყრელი ვერ აკმაყოფილებდა ეკოლოგიურ და სანიტარულ ნორმებს.
შპს “საქართველოს მყარი ნარჩენების მართვის კომპანიამ” საქართველოს რეგიონული განვითარებისა და ინფრასტრუქტურის სამინისტროს კოორდინაციით, ტერიტორიის შემოღობვა განახორციელა, მოაწყო პოლიგონის შიდა გზები, წყალარინების არხები. ასევე, მოხდა ტერიტორიის ელექტრიფიცირება. მოეწყო მიწის კავალიერები შემდგომი ექსპლუატაციისთვის. დამონტაჟდა 60 ტონიანი სამანქანე სასწორი.
ნაგავსაყრელის კეთილმოწყობის პროექტის ღირებულებამ 275 587 ლარი შეადგინა.