"ევროვიზიის" პირველი ნახევარფინალის შემდეგ, გამართულ პრესკონფერენციაზე მონაწილეობა ფინალში გადასულმა 10-მა კონკურსანტმა მიიღო. ნინა სუბლატმა სიმღერის სახელწოდება ქვეყნის ისტორიასა და საერთაშორისო პოლიტიკას დაუკავშირდა.

„ძალიან ამაყი ვარ, რადგან ვიცი მთელი საქართველო ამაყია. ისინი ამას ნამდვილად იმსახურებენ, რადგან ისინი იბრძვიან თავისუფლებისთვის, იბრძვიან ევროპისთვის“ - განაცხადა სუბლატმა.

საქართველოს "საზოგადოებრივი მაუწყებლის" ჟურნალისტის შეკითხვაზე: "არის თუ არა საქართველო მებრძოლი ქვეყანა", ქართველმა კონკურსანტმა შემდეგი პასუხი გასცა:

"ხშირად მესმის კითხვა: რატომ "მებრძოლი", რატომ არის სიმღერის სახელწოდება "მებრძოლი"? ალბათ უცნაურია, რომ 20 წლის გოგონა ასე აზროვნებს და იმაზე ფიქრობს რომ იყოს მებრძოლი, იყოს ფემინისტი. ამის მიზეზი ნამდვილად გვაქვს. ჩვენი ქვეყანა პატარაა და ბევრი ცდილობს ჩვენ განადგურებას. ძალიან რთულია იმის სიტყვებით ახსნა თუ რას ნიშნავს საქართველოსთვის მებრძოლი სული, იმიტომ რომ ჩვენ უკვე საუკუნეებია ვიბრძვით. ეს ისტორიაა, ეს არ არის მარტივი შეკითხვა"-განაცხადა ნინა სუბლატმა.

გერმანელი ჟურნალისტის მიერ დასმულ კითხვაზე, როგორ გრძნობდა თავს, როდესაც ათიათასობით მაყურებლის წინაშე მარტო იდგა სცენაზე, ქართველმა მომღერალმა უპასუხა, რომ ის სავსებით არ გრძნობდა თავს მარტო, რადგან მის გვერდით მთელი საქართველო იყო.