სტუდენტებისთვის ახალი პროექტი „ახალგაზრდები თვითმმართველობისთვის“ დაიწყო

საზოგადოება - 11:15, 21 May, 2015

801

ქ.თბილისის მერიის განათლების, სპორტისა და ახალგაზრდულ საქმეთა საქალაქო სამსახურმა ინტელექტუალური პოტენციალის განვითარების ხელშეწყობისათვის, დემოკრატიული გარემოს შექმნისა და სამოქალაქო ცნობიერების ამაღლებისათვის, პროექტი „ახალგაზრდები თვითმმართველობისთვის“ დაიწყო. პროექტი ითვალისწინებს დედაქალაქში ავტორიზებული უმაღლესი სასწავლებლების სტუდენტებისთვის ქ. თბილისის მუნიციპალიტეტის მერიის სტრუქტურული ერთეულების მუშაობის სპეციფიკის, მიმდინარე და დაგეგმილი პროექტების, მიღწევების, გამოწვევების გაცნობასა და საგანმანათლებლო ხასიათის ლექცია-სემინარების მოწყობას, რაც სტუდენტების თვითმმართველობის პროცესში გააქტიურებას, პროფესიის უკეთ დაუფლებასა და მათ საზოგადოებრივ აქტივობას შეუწყობს ხელს.

„ახალგაზრდები თვითმმართველობისთვის“ პროექტის ფარგლებში, მოსწავლე-ახალგაზრდობის ეროვნულ სასახლეში, „TBC”-ფეის გენერალურმა დირექტორმა დავით კენჭაძემ სტუდენტებთან ღია ლექცია გამართა, თემაზე „21 წესი ცხოვრებაში და კარიერაში წარმატების მისაღწევად“.

შეხვედრას ქ.თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსი გიორგი არეშიძე და საქალაქო სამსახურის წარმომადგენლები ესწრებოდნენ.

როგორც გიორგი არეშიძემ განაცხადა, „დღევანდელი ლექცია საკმაოდ აქტუალურ თემას შეეხებოდა და მოხარული ვარ, რომ საზოგადოებაში დიდი დაინტერესება გამოიწვია. პროექტის „ახალგაზრდები თვითმმართველობისთვის“ ფარგლებში მსგავსი ლექცია-სემინარები პერმანენტულად გაიმართება, რაც დაეხმარება სტუდენტებს პროფესიულ წინსვლაში“ - აღნიშნა გიორგი არეშიძემ.