ექსკლუზივი: ქლორის გაჟონვის შედეგად მოსახლეობა მოიწამლა

ექსკლუზივი: ქლორის გაჟონვის შედეგად მოსახლეობა მოიწამლა - აქცია ზუგდიდში

საზოგადოება - 12:45, 20 May, 2015

1693

ზუგდიდში, წერეთლის ქუჩაზე საპროტესტო აქცია მიმდინარეობს. ადგილობრივმა მაცხოვრებლებმა „ნიუპოსტს“ განუცხადეს, რომ რამდენიმე დღის წინ წერეთლის ქუჩაზე ყოფილი ღვინის ქარხნის შენობაში უცნობმა პირებმა ქლორის ერთტონიანი ავზი შეიტანეს, საიდანაც დიდი ოდენობით ქლორის გაჟონვა მოხდა, რის შედეგადაც მართი თქმით, ადგილობრივი მოსახლეობის ნაწილი მოიწამლა.

აქციის მონაწილეები „ნიუპოსტსთან“ საუბრისას განმარტავენ, რომ ქლორის გაჟონვის შემდეგ ისინი სასუნთქი გზების უკმარისობას, წვას და მოწამვლის აღმნიშვნელ სხვა ნიშნებს უჩივიან. მათივე თქმით, ქლორის გაჟონვის შედეგად ეზოებში სხვადასხვა სახის ნარგავები გაუნადგურდათ.

„ნიუპოსტის“ ინფორმაციით, ქლორის ავზი, რომელიც უცნობმა პირებმა ძველი ღვინის ქარხნის ტერიტორიაზე შეინახეს, ოკუპირებული აფხაზეთის ტერიტორიიდან არის გამოტანილი და სავარაიუდოდ იგი ჯართში ჩასაბარებლად იყო განკუთვნილი. ამ ავზით საბჭოთა კავშირის დროს, მდინარე რეჩხისწყლის დაქლორვა ხდბოდა, რომელიც შემდგომში სასმელი წყლის სახით, მთლიანად გალის რაიონს და ზუგდიდის ნაწილს ამარაგებდა.

აქვე შეგახსენებთ, რომ რამდენიმე წლის წინ, რუსმა ოკუპანტებმა სოფელ რეჩხში განზრახ მოახდინეს ქლორის გაჟონვა, რის შედეგადაც ოთხი ადამიანი გარდაიცვალა და რამდენიმე ადამიანმა სხეულის მძიმე დაზიანება მიიღო, იმ შემთხვევაში სოფლის მოსახლეობის ევაკუაცია გახდა საჭირო.

წერეთლის ქუჩის მოსახლეობა ითხოვს, სასწრაფოდ მოხდეს ქლორის ავზის ქალაქიდან გატანა და დაუყოვნებლივ განეიტრალდეს მთელი ქუჩა.

"ნიუპოსტი" შინაგან საქმეთა სამინისტროს დაუკავშირდა. უწყებაში განმარტავენ, რომ მომხდართან დაკავშირებით გამოძიება არ მიმდინარეობს