19 მაისს სპორტისა და ახალგაზრდობის საქმეთა სამინისტროში საქართველოს სუმოს ფედერაციის ხელმძღვანელთა პრესკონფერენცია გაიმართა, სადაც საქართველოს ეროვნული და ასაკობრივი ნაკრებების მიერ ევროპის ჩემპიონატზე მოპოვებული წარმატება შეფასდა.

8-10 მაისს ლიტვის ქალაქ შაულიაიში სუმოისტთა ევროპის ჩემპიონატი ჩატარდა. ქართველი სუმოისტები ოთხივე ასაკობრივ კატეგორიაში გამოვიდნენ და 18 მედალი მოიპოვეს - 4 ოქრო, 5 ვერცხლი და 9 ბრინჯაო. უფროსებში, აბსოლუტურ წონაში გიორგი მეშვილდიშვილი ბრინჯაოს, ავთანდილ ცერცვაძე კი ვერცხლის მედალს დაეუფლა. პირად გუნდურში კი მეშვილდიშვილს და ცერცვაძეს გიგა გელაშვილი და გიორგი ფარადაშვილი დაემატნენ და ვერცხლის მედალი მოიპოვეს.

23-წლამდელებში ჩემპიონები გახდნენ - გიგა გელაშვილი (+115 კგ) და გიორგი მეშვილდიშვილი (აბსოლუტური). ბრინჯაოს მედლები დაისაკუთრეს - ზურაბ აქუბარდიამ (-115 კგ) და გიორგი მეშვილდიშვილმა (-115). ახალგაზრდებმა ბრინჯაო მოიგეს გუნდურშიც, სადაც მეშვილდიშვილს და გელაშვილს დაემატნენ გიორგი ფარადაშვილი და ნიკოლოზ სისვაძე.

21-წლამდელებში ჩემპიონები გახდნენ - გიგა გელაშვილი (+115 კგ) და გიორგი ფარადაშვილი (აბსოლუტური), ვერცხლი მოიპოვეს - ნიკოლოზ სისვაძემ (-100 კგ), გიორგი ფარადაშვილმა (+115 კგ) და გიგა გელაშვილმა (აბსოლუტური). ბრინჯაოს გუნდურ პირველობაში დასჯერდნენ - გიგა გელაშვილი, გიორგი ფარადაშვილი, ნიკოლოზ სისვაძე და შამილ გოგოჭური.

18-წლამდელებმა 4 ბრინჯაო მოიპოვეს - ნიკოლოზ სისვაძემ (-100 კგ), შამილ გოგოჭურმა ორი +100 კგ-ში და აბსოლუტურში. ამათ პირად-გუნდურში დაემატათ დავით რაზმაძე და თანაგუნდელებს ბრინჯაოს მედლის მოპოვებაში დაეხმარა.