დედოფლისწყაროს განახლებული მუნიციპალური ნაგავსაყრელი მოემსახურება

საზოგადოება - 14:58, 18 May, 2015

1089

დედოფლისწყაროს განახლებული მუნიციპალური ნაგავსაყრელი მოემსახურება. კეთილმოწყობის მიზნით ჩატარებული სამშენებელო-სამონტაჟო სამუშაოები დღეს საქართველოს რეგიონული განვითარებისა და ინფრასტრუქტურის სამინისტროს „მყარი ნარჩენების მართვის კომპანიის“ დირექტორმა გიორგი შუხოშვილმა, კახეთში სახელმწიფო რწმუნებულ-გუბერნატორ ირაკლი შიოლაშვილთან და ადგილობრივი თვითმმართველობის წარმომადგენლებთან ერთად დაათვალიერა.

პოლიგონის ტერიტორია 60986 კვადრატულ მეტრს მოიცავს, სადაც დედოფლისწყაროდან და მიმდებარე სოფლებიდან ყოველდღიურად 80 მ3 ნარჩენი შედის. დედოფლისწყაროს მუნიციპალური ნარჩენების ნაგავსაყრელი „საქართველოს მყარი ნარჩენების მართვის კომპანიას“ საკუთრებაში 2013 წლის 10 მაისს გადმოეცა. იმ დროისთვის ნაგავსაყრელზე არსებული მდგომარეობა უკიდურესად მძიმე იყო. ნარჩენების შეტანა ხდებოდა არაორგანიზებულად, ნაგავსაყრელი სტანდარტებთან შეუსაბამოდ ოპერირება და ვერ აკმაყოფილებდა ეკოლოგიურ და სანიტარულ ნორმებს.

“საქართველოს მყარი ნარჩენების მართვის კომპანიამ,” საქართველოს რეგიონული განვითარებისა და ინფრასტრუქტურის სამინისტროს კოორდინაციით, დედოფლისწყაროს მუნიციპალიტეტის ნაგავსაყრელზე, კეთილმოწყობის მიზნით, სამშენებლო-სამონტაჟო სამუშაოები ჩაატარა, რომლის ფარგლებშიც პოლიგონის შიდა გზები და წყალარინების არხები მოეწყო. ნარჩენები საიზოლაციო ფენით გადაიფარა, შემოიღობა ნაგავსაყრელის ტერიტორია. დამონტაჟდა სახანძრო სტენდი, ნაგავსაყრელის მაჩვენებელი და ამკრძალავი ნიშნები. ასევე, მოხდა ობიექტის ელექტრიფიცირება.

ნაგავსაყრელის კეთილმოწყობის პროექტის ღირებულებამ 230 000 ლარი შეადგინა. პროექტი კი სახელმწიფო ბიუჯეტიდან დაფინანსდა. განახლებული პოლიგონის ექსპლუატაციაში შესვლის შემდგომ, ნარჩენების მიღება და მათი განთავსება, მოქმედი სტანდარტების შესაბამისად, სპეციალურად გამოყოფილ უჯრედებში მოხდება.