არასამთავრობოები ჰომოფობიასთან და ტრანსფობიასთან ბრძოლის საერთაშორისო დღესთან დაკავშირებით შეიკრიბნენ

საზოგადოება - 13:59, 17 May, 2015

803

მრგვალ ბაღში ჰომოფობიასთან და ტრანსფობიასთან ბრძოლის საერთაშორისო დღესთან დაკავშირებით 19-მა არასამთავრობო ორგანიზაციამ შეკრება გამართა.

არასამთავრობოების მიერ ორგანიზებულ აქციაზე ორგანიზატორებმა საზოგადოებას 2012 წლის 17 მაისს მომხდარ მოვლენებთან დაკავშირებით, ადამიანის უფლებათა ევროპული სასამართლოს განცხადებას გააცნეს. ამონარიდები განცხადებიდან ორგანიზატორებმა პლაკატების სახით გაშალეს.

როგორც ორგანიზატორები განმარტავენ დოკუმენტში აღნიშნულია, რომ “სხვადასხვა სექსუალური უმცირესობის ფუნდამენტურ უფლებათა შესახებ კამპანიის წარმოებისა და ცნობიერების ამაღლების მიზნით, კონვენცია გამოხატვის საჯარო ფორმებს იცავს, მათ შორის, მშვიდობიანი შეკრების გამართვის უფლებასა და აზრის გამოხატვის თავისუფლებას.”

არასამთავრობო ორგანიზაციების წარმომადგენლებმა მიმართეს შსს-ს და მოუწოდეს, რომ დაიცვას ადამიანების უსაფრთხოება და მომავალში უფრო ეფექტურად აღკვეთოს ნებისმიერი სახის ძალადობა და დისკრიმინაცია.

“იმედს გამოვთქვამთ, რომ 2015 წელს მაინც, საქართველოს ხელისუფლება შეძლებს ეფექტიანად დაიცვას საკუთარი მოქალაქეების გამოხატვის, შეკრებისა და მანიფესტაციის უფლება მიუხედავად მისი სქესის, ენის, რელიგიის, პოლიტიკური თუ სოციალური წარმომავლობის, ქონებრივი, წოდებრივი თუ სხვა მდგომარეობისა,”-აღნიშნულია ორგანიზატორების მიერ გავრცელებულ განცხადებაში.