,,ინგა გრიგოლიას ქარტიის პრინციპი არ დაურღვევია“ - საპარლამენტო უმრავლესობამ დავა წააგო

საზოგადოება - 19:00, 16 May, 2015

2370

საქართველოს ჟურნალისტური ეთიკის ქარტიის საბჭომ, გადაწყვეტილება საქმეზე “საპარლამენტო უმრავლესობა ინგა გრიგოლიას წინააღმდეგ” - გრიგოლიას სასარგებლოდ გამოიტანა.

,,საქართველოს ჟურნალისტური ეთიკის ქარტიის საბჭომ განიხილა საპარლამენტო უმრავლესობის განცხადება ჟურნალისტ ინგა გრიგოლიას წინააღმდეგ. განცხადება ეხებოდა 2015 წლის 20 მარტის გადაცემა „რეაქციას”. განმცხადებლის პოზიციით, ადგილი ჰქონდა ქარტიის პირველი პრინციპის დარღვევას.

საქმე განიხილა საბჭოს ექვსმა წევრმა. დამსწრე წევრებიდან მხოლოდ სამმა მიიჩნია, რომ ჟურნალისტის მიერ დაირღვა ქარტიის პირველი პრინციპი. ქარტიის საქმისწარმოების წესის თანახმად ქარტიის პრინციპი დარღვეულად ჩაითვლება საბჭოს 5 წევრის თანხმობის შემთხვევაში, შესაბამისად არ დადგინდა ინგა გრიგოლოას მიერ ქარტიის პირველი პრინციპის დარღვევა“ - ნათქვამია ჟურნალისტური ეთიკის ქარტიის განცხადებაში.

შეგახსენებთ, რომ გადაცემა რეაქციის ეთერში, სადაც მთავარი თემა იყო, მიდიხარ თუ არა 21 მარტს ნაციონალური მოძაობის აქციაზე - ოცნების საპარლამენტო უმრავლესობამ ინგა გრიგოლიას კატეგორიულად მოსთხოვა, რომ ეს თემა არ გაშუქებულიყო თოქ-შოუს ფორმატში, ,,წინააღმდეგ შემთხვევაში მათ განგვიცხადეს, რომ არ მოვლენ“ - ეს განცხადება თავად ინგა გრიგოლიამ გადაცემის ანონსში გააკეთა.

,,ჩვენ ხელისუფლების მოთხოვნას არ ვემორჩილებით! ვნახოთ გადაიფიქრებს თუ არა ხელისუფლება იგივე ქმედებას, რაც 2006 წელს ამ სტუდიაში სწორედ რეაქციის ბოიკოტირებით დაიწყო“ - განაცხადა ინგა გრიგოლიამ.