აღმაშენებლის ხეივანსა და მიმდებარე ქუჩებზე მოძრაობა რამდენიმე საათია პარალიზებულია. გადაკეტილია ასევე დიღმის საავადმყოფოებთან მისასვლელი გზა, რამაც საზოგადოების უკმაყოფილება გამოიწვია. ადგილზე რამდენჯერმე მოხდა შელაპარაკება საპატრულო პოლიციის თანამშრომლებსა და მძღოლებს შორის.

„ორსული ცოლი მიზის მანქანაში, რა გავაკეთო? როგორ მივიდე საავადმყოფომდე?“, - განაცხადა ერთ-ერთმა მძღოლმა პატრულთან შელაპარაკების დროს.

გადაკეტილი იყო თბილისის გასასვლელიც. მძღოლებს საცობში ყოფნა რამდენიმე საათით მოუწიათ.

აღნიშნული ფაქტის გამო ხელისუფლება ტრანსპორტისა და გზების ასოციაციის თავმჯდომარემ, დავით მესხიშვილმა, გააკრიტიკა.

„ველორბოლის საწინააღმდეგო არაფერია, მაგრამ კატეგორიულად მიუღებელია ქალაქში ცენტრალური ავტომაგისტრალის გადაკეტვა. ამ საგზაო უძრაობამ გამოიწვია ის, რომ ვერ ხერხდებოდა დღის გამავლობაში სასწრაფო დახმარების გადაადგილება. ხელისუფლებამ ისიც კი არ იკადრა, რომ მოსახლეობას მიეღო ინფორმაცია აღნიშნული ღონისძიების შესახებ,“ - განაცხადა დავით მესხიშვილმა.

შეგახსენებთ, გზის გადაკეტვის მიზეზი ველორბოლისთვის მზადებაა.