"სულ მისვამენ შეკითხვას - საიდან ეს გვარიო..."- ფრანგი ჰოკეისტი ქართული გვარით

საზოგადოება - 21:31, 15 May, 2015

29766

საფრანგეთის ნაკრების მცველი ფლორიან შაკიაშვილი, სავარაუდოდ ქართული გვარის მქონე პირველი ჰოკეისტია, რომელიც მსოფლიო ჩემპიონატში მონაწილეობს. როგორც გაირკვა, 23 წლის ფლორიან შაკიაშვილმა საქართველოზე ბევრი არაფერი იცის, თუმცა ის კი იცის, რომ ქართულ გვარს ატარებს. კობა ლიკლიკაძემ ფლორიან შაკიაშვილთან საუბარი დაიწყო შეკითხვით მსოფლიო ჩემპიონატის ერთ-ერთ ფავორიტთან, კანადის ნაკრებთან გამართულ მატჩზე: მასში საფრანგეთის გუნდი მინიმალური სხვაობით დამარცხდა - 3:4.

ფლორიან შაკიაშვილი: კი, ვეთამაშეთ კანადის ძალიან კარგ გუნდს. ჩემი აზრით, ძალიან კარგად ითამაშეს. ახლოს ვიყავით დამატებითი დროის დანიშვნასთან - შედეგით საკმაოდ კმაყოფილი ვართ.

რადიო თავისუფლება: ეს არის, როგორც ვიცი, მეორე მსოფლიო ჩემპიონატი თქვენს კარიერაში.

ფლორიან შაკიაშვილი: დიახ, შარშან მინსკში ვიყავი. ესეც საუცხოო გამოცდილება იყო. ჩვენ ნახევარფინალში გავედით. ასე რომ, შარშანაც კარგად ვითამაშეთ. ძალიან კმაყოფილი ვარ.

რადიო თავისუფლება: საფრანგეთში ჰოკეი პოპულარულია? როგორც, დავუშვათ, ფეხბურთი, ან რაგბი...

ფლორიან შაკიაშვილი: არა, პრინციპში არა. მაგრამ ვფიქრობ, უფრო პოპულარული გახდება პარიზში მსოფლიო ჩემპიონატის შემდეგ - ორ წელიწადში. ამის შემდეგ, საქმე, ალბათ, უკეთ წავა.

რადიო თავისუფლება: ჩემთვის და ჩემი კოლეგებისათვის განსაკუთრებით საინტერესოა თქვენი გვარი - შაკიაშვილი. თუ შეიძლება, უამბეთ მსმენელს თქვენი ოჯახის შესახებ.

ფლორიან შაკიაშვილი: შევეცდები ავხსნა. გვარი მამაჩემის მხრიდან არის - მისი მამა ქართველმა კაცმა იშვილა და თავისი გვარი მისცა. ამიტომ ვარ შაკიაშვილი.

რადიო თავისუფლება: რა იცით საქართველოზე?

ფლორიან შაკიაშვილი: ბევრი არაფერი. როგორც გითხარით, პირველ რიგში ფრანგი ვარ. არა ვარ ქართველი, მარტო გვარი მაქვს ქართული.

რადიო თავისუფლება: საფრანგეთის მოქალაქეები, მაგრამ ქართული გვარით, არიან ძმები იაშვილები, მორაგბეები.

ფლორიან შაკიაშვილი: დიახ, დიახ - მსგავსი გვარია.

რადიო თავისუფლება: აპირებთ საქართველოში ჩასვლას? ქვეყნის გასაცნობად.

ფლორიან შაკიაშვილი: პრინციპში არა, თუმცა რატომაც არა? კარგი იქნებოდა ქვეყნის ნახვა.

რადიო თავისუფლება: საფრანგეთში მცხოვრები ქართველები თუ მოდიან ხოლმე თქვენთან ამავე შეკითხვით?

ფლორიან შაკიაშვილი: კი, სულ მისვამენ შეკითხვას - საიდან ეს გვარიო. და ყოველ ჯერზე ვუხსნი ხოლმე. ეს ნორმალურია.

წყარო www.radiotavisupleba.ge