ფინანსთა სამინისტროს აკადემიასა და ICC-ს შორის თანამშრომლობის მემორანდუმი გაფორმდა

ბიზნესი & ეკონომიკა - 16:10, 15 May, 2015

1273

დღეს ფინანსთა სამინისტროს აკადემიასა და საერთაშორისო სავაჭრო პალატის ეროვნული კომიტეტი საქართველოში (ICC) შორის ურთიერთთანამშრომლობის მემორანდუმი გაფორმდა.

აღნიშნული მემორანდუმის ფარგლებში მხარეები შეთანხმდენენ მიიღონ მონაწილეობა ორივე მხარისათვის აქტუალურ საკითხებზე ერთობლივი სამუშაო შეხვედრების, სემინარების, ბიზნეს-კონფერენციების, სიმპოზიუმების ორგანიზებაში, ასევე სხვა სახის სასწავლო-საგანმანათლებლო (მათ შორის საზოგადოებრივ-საგანმანათლებლო) პროექტების განხორციელებაში.

ზემოთ ჩამოთვლილი ღონისძიებები მიზნად ისახავს სახელმწიფო და კერძო სექტორს შორის ურთიერთობების გამყარებას, ბიზნეს გარემოს გაუმჯობესებას, დასაქმების ხელშეწყობას ასევე ტრენინგებისა და სასწავლო პროექტების განხორციელების გზით, უნარებისა და შესაძლებლობების განვითარებას. კერძოდ - ორივე მხარე ჩართული იქნება ბიზნეს სექტორთან თბილისსა თუ რეგიონებში დაგეგმილი შეხვედრების ორგანიზებასა და განხორციელებაში, რომელიც ხელს შეუწყობს მათი პრობლემების, საჭიროებების გამოვლენას და შესაბამისი სასწავლო კურსების დაგეგმვას.

საერთაშორისო სავაჭრო პალატა ხელს შეუწყობს აკადემიის კვალიფიციურ და წარმატებულ მსმენელთა დასაქმებას პარტნიორ ბიზნეს ორგანიზაციებში, მათთვის ინფორმაციის მიწოდებისა და ერთობლივი დასაქმების ფორუმების ორგანიზების გზით.