რა მიზნით მოდიოდა ,,კანონიერი ქურდი“ თემურ გვასალია (სოხუმსკი) საქართველოში

კრიმინალი - 14:05, 15 May, 2015

16959

როგორც დღეს გახდა ცნობილი, საქართველოს შინაგან საქმეთა სამინისტროს კრიმინალური პოლიციის დეპარტამენტის სამეგრელო-ზემო სვანეთის სამხარეო სამმართველოს და კონტრტერორისტული ცენტრის თანამშომლებმა, ჩატარებული ოპერატიულ-საგამოძიებო ღონისძიებების შედეგად, კანონიერი ქურდობის და ნარკოტიკული საშუალების შეძენა-შენახვის ბრალდებით 1972 წელს დაბადებული, წარსულში ყაჩაღობისა და სხვადასხვა მძიმე დანაშაულისთვის ნასამართლევი ,,კანონიერი ქურდი“ თემურ გვასალია სოფელ რუხში დააკავეს.

გამოძიებამ დაადგინა, რომ გვასალია საქართველოში აფხაზეთის ოკუპირებული ტერიტორიდან შემოვიდა.

,,ნიუპოსტის“ იფორმაციით, გვასალია მრავალი წელია საქართველოში არ იმყოფება, ის აფხაზეთის ტერიტორიაზე საკმაო გავლენით სარგებლობს. გვასალია თბილისში მკურნალობის მიზნით ცდილობდა ჩამოსვლას. არსებული ინფორმაციით, თემურ სოხუმსკის ყალბი პასპორტითა ცდილობდა საქართველოში შემოსვლას. ის თემურ სონგულიას სახელით ფიქსირდებოდა აფხაზურ პასპორტში.

თემურ სოხუმსკი, გასულ წელს აფხაზეთის ტერიტორიაზე იქნა დაკავებული. არსებული ინფორმაციით, გვასალია კრიმინალურ სამყაროში შეუვალ ავტორიტეტად და ,,ქურუდული იდეის“ თავგამოდებულ მებრძოლად ითვლება. გვასალიას ,,ქურდული ნათლობა“ 2013 წლის დეკემბრის დასაწყისში მოხდა იმ ,,კანონიერი ქურდების“ ხელდასმით, როგორებიც არიან ვალიკო ჯეჯია (ვალტერი), გიორგი უგლავა (ტახი) და ირაკლი ყალიჩავა (იკა ხუტუ).

ცნობილია, რომ აფხაზეთი წლების მანძილზე ე.წ. კანონიერი ქურდების ,,მშვიდი ნავსაყუდელია“, მათთვის, ვინც თავს არიდებს სამართალდამცავი ორგანოების ყურადღების ცენტრში ყოფნას.

თემურ გვასალიას საქართველოში დაკავებისას, პირადი ჩხრეკის დროს ნარკოტიკული საშუალება აღმოაჩნდა. ნარკოლოგიური შემოწმებით მას ოპიუმის ჯგუფის ნარკოტიკის მოხმარების ფაქტი დაუდგინდა. თემურ გვასალია კანონიერ ქურდობას აღიარებს.

გამოძიება კანონიერი ქურდობის და ნარკოტიკული საშუალების შეძენა-შენახვის ფაქტზე მიმდინარეობს (საქართველოს სსკ-ის 223 პრიმა მუხლის მე-2 ნაწილით და 260-ე მუხლის 1-ლი ნაწილით.