რომან გოცირიძე ეროვნული ბანკის პრეზიდენტის განცხადებას ეხმაურება, იმასთან დაკავშირებით, რომ ქვეყანაში იმპორტის შემცირება ლარის კურსზე გავლენის თვალსაზრისით დადებითი ეფექტის იქნება და გაუფასურებაზე ზეწოლას შეამცირებს. გოცირიძის მოსაზრებით იმპორტის შემცირებას მაშინ ექნებოდა ეფექტი, იმპორტთან ერთად ექსპორტიც რომ არ შემცირებულიყო, ამ მომენტისთვის კი დადებითი ეფექტი უარყოფითმა ეფექტმა გაანეიტრალა:

„იმპორტის შემცირება ეს იმას ნიშნავს რომ მაკროეკონომიკურ გარემოზე ლარის ახალმა კურსმა დაიწყო ზემოქმედება. იმპორტის შემცირებას მაშინ ექნებოდა ეფექტი, თუ ქვეყანაში ექსპორტი არ შემცირდებოდა, მაგრამ სამწუხაროდ ექსპორტიც შემცირდა. მთლიანობაში სავაჭრო ბალანსის უარყოფითი სალდო გაიზარდა, ამიტომ ეს დადებითი ეფექტი უარყოფითმა ეფექტმა გაანეიტრალა.“- განაცხადა გოცირიძემ.

ექსპერტის აზრით, მოსაზრება იმის შესახებ, რომ ეკონომიკურ პროცესებზე ფსიქოლოგიური ფაქტორიც ახდენს გავლენას მართალია, თუმცა ზოგ შემთხვევაში მთავრობა ამ მოსაზრებას თავის მართლების და პრობლემების სხვებზე გადაბრალების მიზნით იყენებს:

„ფსიქოლოგიური ფაქტორი ყოველთვის ახდენს გავლენას ეკონომიკურ პროცესებზე, მაგრამ მთავრობის წევრები ზოგჯერ საუბრობენ სულ სხვაგვარ ფსიქოლოგიურ ფაქტორებზე, მაგალითად ნოდარ ჯავახიშვილის ამბობდა, რომ საკმარისია რომელიმე ჭკვიანმა ადამიანმა ლარის გამყარებასთან დაკავშირებით განცხადება გააკეთოს და ლარი გამყარდებაო. თუ ასეთი მნიშვნელოვანია ფსიქოლოგიური ფაქტორები, მათაც აამუშაონ ეს ფაქტორები ლარის გასამყარებლად. ლარი განცხადებებით არც მყარდება და არც სუსტდება, მოკლე პერიოდში შეიძლება მცირეოდენი ზემოქმედება ქონდეს მას. თავისთავად აჟიოტაჟი არ უნდა შეიქმნას და პროცესი მშვიდ რეჟიმში უნდა მოქმედებდეს, მაგრამ როდესაც ფინანსთა მინისტრი ასეთ განცხადებას აკეთებს ეს არის თავის მართლება და პრობლემების სხვებზე გადაბრალება. ჩვენ ვნახეთ რომ ლარს სამი მტერი მოუძებნეს, პირველი ეს არის სპეკულანტები ანუ კომერციული ბანკები, რომელიც მათი აზრით ამ პროცესში ფულს შოულობენ, მაგრამ რეალურად პირიქითაა ისინი ყველაზე მეტად დაზარალდნენ . მეორე იყო ეროვნული ბანკი, რომელიც მავნე მიზნებიდან გამომდინარე შეგნებულად ასუსტებს ლარს და მესამე- ესენი არიან ექსპერტები. ეს განცხადებები უკვე გავიარეთ, ახლა მთავარია რომ ფინანსთა სამინისტრომ ბიუჯეტს მიხედოს. ბიუჯეტი თავიდან დასაგეგმია და ის უნდა იყოს ნაკლებ დეფიციტური და ნაკლებმფლანგველური. ბიუჯეტის ხარჯები, რომ არ ყოფილიყო ამხელა მოცულობის ლარის მდგომარეობა იქნებოდა სხვანაირი.“- აცხადებს ექსპერტი.

რომან გოცირიძე ნოდარ ხადურის განცხადებასაც გამოეხმაურა იმასთან დაკავშირებით, რომ საქართველოს მთავრობა ყველაფერს აკეთებს, რომ უახლოეს მომავალში კურსი არათუ დასტაბილურდეს, არამედ უკან დაიწიოს, ექსპერტის თქმით, როგორც ჩანს ფინანსთა მინისტრი რაღაცის გაკეთებას აპირებს: „ჯერჯერობით რაიმე კონკრეტული ნაბიჯი გარდა განცხადებებისა ჯერ ჩვენ არ გვინახავს. თუ ის გულისხმობდა ბიუჯეტის კორექტირებას, ეს იქნება სწორი ნაბიჯი.“

რომან გოციურიძემ EBRD-ის ბიზნესფორუმთან დაკავშირებითაც ისაუბრა და აღნიშნა, რომ არ შეიძლება იმ მოლოდინების გაჩენა თითქოს ლარის კურსი ამ ბიზნესფორუმთან არის მიბმული:

„EBRD ბიზნესფორუმი არის ადგილი სადაც ადამიანები იკრიბებიან, 3 ათასი კაცი იმიტომ კი არ ჩამოვიდა რომ საქართველოს ნახვა უნდოდათ, ეს არის ფორუმი სადაც ბიზნესი და სამთავრობო წრეები აზრს უზიარებენ და ერთმანეთს ხვდებიან. საქართველო ამ შემთხვევაში არის შეხვედრის ადგილი და მხოლოდ იმ ფაქტს, რომ შეხვედრის ადგილი საქართველოშია დანიშნული არაფერი არ მოაქვს და სასაცილოა, რომ EBRD პროექტი ლარს მიაბა. ზოგადად თუ ქვეყანა დახვდებოდა კარგი ბიზნეს პროექტებით აჩვენებდა კარგ ეკონომიკურ ზრდას, სტაბილურ ეკონომიკურ ვითარებას, აჩვენებდა ბუნებას და განათებულ ქალაქებს, კარგ ღვინოს და კარგ სურსათს ეს დადებითი შანსია საკუთარი ქვეყნის დადებითი იმიჯის წარმოსაჩენად, მაგრამ თუ ლარის დევალვაცია პირზე აკერია ყველას და ყველა უცხოელი სადაც ბანკში შევა ლარის გაუფასურებაზე დაუწყებენ საუბარს კარგი არ იქნება.“- განაცხადა რომან გოცირიძემ.

_{ნინო ზედგენიძე}