"მასწავლებელმა თავში ჯოხი დაარტყა... ამცირებდა, ჩაუცმელი ხარო"

"მასწავლებელმა თავში ჯოხი დაარტყა... ამცირებდა, ჩაუცმელი ხარო" - რა ხდება გურიის სკოლებში

საზოგადოება - 14:43, 14 May, 2015

9319

ოზურგეთის მუნიციპალიტეტის დაბა ნასაკირალში მცხოვრები შავაძეები ამავე სკოლის დირექტორს და პედაგოგებს შვილების დისკრიმინაციაში ადანაშაულებს და ოთხივე შვილის სკოლაში მიყვანაზე უარს აცხადებს მანამდე, ვიდრე სკოლის დირექტორი თანამდებობას არ დატოვებს.

როგორც ბავშვების მამა ამირან შავაძე აცხადებს, სკოლის დირექტორის დავალებით უცხო ენის პედაგოგმა 12 მღოლის თანდასწრებით მის შვილს სიტყვიერი შეურაცხყოფა მიაყენა, რის გამოც ბავშვებმა სკოლაში წასვლაზე უარი განაცხადეს:

,,23 მარტიდან ჩემი შვილები სკოლაში აღარ დადიან, სკოლაში დირექტორის დავალებით ბავშვების დაჩაგვრა ხდება, ჩამოიყვანა სკოლის დირექტორმა ინგლისურის მასწავლებელი და ჩემი შვილი დაამცირა 12 მძღოლთან - ჩაუცმელია, მოუწესრიგებელია და ნიშანი არ ეკუთვნისო, თუ ასეა, მაშინ სიგელი საიდან აქვს. სანამ სკოლის დირექტორს არ გაუშვებენ, ვაცხადებ, რომ ბავშვებს სკოლაში არ მივიყვან. იმის გამო, რომ პროგრამას არ ჩამორჩენ, სახლში ვამეცადინებ, სკოლის პროგრამაც ვუსწრებთ წინ. ამას საკუთარი ძალებით ვახერხებ. ეს ყველფერი იძულებით ხდება. ცოტა ხნის წინ შეტყობინება მომივიდა რომ სკოლის გაცდენის გამო საშემოდგომო გამოჰყვათ. წერილობით მივმართე თამარ სანიკიძესაც და ვითხოვ მასთან შეხვედრას, მივწერე, რომ სკოლაში დარღვევებია, ჩემ შვილებს ჩაგრავენ, _გვიყვება მამა, ამირან შავაძე.

შავაძის თქმით, დირექტორი შვილების დისკრიმინაციით მასზე სამაგიეროს გადახდას ცდილობს, როგორც მამა აცხადებს, სკოლის სამეურვეო საბჭოს წევრი იყო და იმის გამო, რომ მისივე საჩივრის საფუძველზე სკოლაში არსებული დარღვევების შესწავლა გენერალურმა ინსპექციამ დაიწყო, დირექტორი მის შვილების შევიწროვებას ცდილობს:

,,ადრე ნასაკირალის საჯარო სკოლაში ვიყავი სამეურვეო საბჭოს წევრი, დარღვევების შესახებ ყველაფერი ვუთხარი ოზურგეთის რესურს ცენტრს, გენისპექცია ამოვიდა და დაიწო გამოძიება და ჩემი ეჭვებიც დადასტურდა. ამის შემდეგ დირექტორი გადამეკიდა და გადაეკიდა ჩემ შვილებსაც, დარღვევაა მძღოლების შემთხვევაშიც, თავდაპირველად 8 მძღოლი ჰყავდა სკოლას, სოფლის მხარდაჭერა რომ მოეპოვებინა, 6 მძღოლი თვითნებურად დაამატა. 4 წარჩინებული მოსწავლე სკოლაში ვერ წამიყვანია, ჩემ პირველ კლასელ მოსწავლეს მასწავლებელმა ჯოხი დაარტყა თავში, დასამცირებლად და დასასჯელად გავაგზავნო ბავშვები სკოლაში? არავინ ყურადღება არ მომაქცია, იმიტომ, რომ ჩვენი სკოლის დირექტორი პოლიციელიც არის და გამგებელიც ყოფილა, ვერსად სამართალი ვერ ვნახე, ჯაჭვია შეკრული და ყურადღებას არავინ მაქცევს,"- აცხადებს ამირან შავაძე.

,,ერთ დღეს მამამ იკითხა, სად აირის ბავშვიო, ავედი და ვნახე ოთახში თმას იწეწავდა, მასწავლებელმა შეურაცხყოფა რატომ უნდა მომაყენოსო, ამის შემდეგ სკოლაში წასვლაზეც უარი თქვა. გაუნათლებელი ხარ, ტანზე არ გაცვიაო და ნიშანს ხათრით მაწერინებს მშობელიო, სინამდვილეში საერთოდ არ გეკუთვნის კარგი ნიშანიო. 12 მძღოლთან ერთად მოხდა შეურაცხყოფის მიყენება," _ ყვება დედა მაია დიასამიძე.

შავაძეების თქმით, სკოლაში პრობლემები ბიძაშვილსაც შეექმნა, რომელსაც როგორც თვითონ აცხადებენ სკოლის დირექტორმა სალაროს ქურდობა დააბრალა:

,,იმის გამო, რომ ჩემი შვილი ამ ბავშვების ბიძაშვილია, სკოლის დირექტორი მასაც გადაეკიდა და სეიფის გატეხვა დააბრალა. ეს როგორ შეიძლება, თუ ამ საქმეს ყურადღებას არ მიაქცევენ, დირექტორსაც და სკოლის დამრიგებელსაც ჩემი ხელით მოვკლავ და წავალ ციხეში, თუ არა და გამოიკვლიონ ეს საქმე," _ გვიყვება ბავშვის მარინა აბულაძე.

,,დირექტორმა სკოლის სალაროს გატეხვაც კი დააბრალა, სხვა მიზეზი რომ ვერაფერი გვიპოვა. ისეთ დღეში ვართ, ნუ იკითხავთ, მე გუშინ გავიგე ეს ამბავი, ბიჭმა უთხრა პოლიცია გამოიძახეო და არ გამოიძახა, ამხანაგებიც კი დაადასტურებენ, რომ მსგავსი რამის გამკეთებელი ნამდვილად არ არის. 12 კლასელ ბიჭს სიცოცხლე გაუმწარა, აღარც გაკვეთილი უნდა და არც სკოლაში მისვლა. ამას მთავრობა არ აქცევს ყურადღებას და იქნებ რამით დაგვეხმაროთ, ყველაფერზე წამსვლელია ის სკოლის დირექტორი," _ აცხადებს ბებია ეთერ შავაძე.

დაბა ნარუჯის სკოლის დირექტორი სპარტაკ გოგიტიძე შავაძეების ბრალდებას დისკრიმინაციაზე უსაფუძლოს უწოდებს და აცხადებს, რომ შავაძეებს გარკვეული ძალები მართავენ და ამ ძალებში სკოლის ყოფილ მოადგილეს გულისხმობს.

რაც შეეხება შავაძეების სასწავლო პროცესიდან ამოვარდნას, აცხადებს, რომ უამრავი მცდელობის მიუხედავად ბავშვები სკოლაში დაებრუნებინა, უშედეგო აღმოჩნდა:

,,23 მარტიდან მშობელმა, ამირან შავაძემ თავისი 4 შვილი უმიზეზოდ სკოლიდან გაიყვანა, მითხრა, რომ გარკვეული პრეტენზიები აქვს ჩემი და პედაგოგების მიმართ, 16 იანვარს ახალი სასწავლო პროცესი დაწყებული იყო, როცა შეიტანა საჩივარი გარკვეულ პრობლემებზე, რაც შეისწავლა გენერალურმა ინსპექციამ და მიიღო კიდეც სკოლამ შენიშვნები, მაგრამ ჩემ მიმართ რატომ არის ასეთი განწყობით უცნობია. აბსურდული ბრალდებაა, თითქოს სალაროს გატეხვას ვაბრალებდე, არც არანაირი ფიზიკური ანგარიშსწორება არ ყოფილა მის მიმართ. ბავშვებს დადებითად დავახასიათებდი, რამდენჯერმე მივმართეთ მშობელს და გვქონდა მცდელობა ბავშვები უკან დაგვებრუნებინა, მაგრამ უშედეგოდ. მე მგონია, რომ ამ ადამიანის უკან გარკვეული ძალები დგას, როლებიც ჩემს მიმართ ასე განაწყობენ, ჩემი დირექტორად არჩევის დროს, მე შევცვალე ყოფილი დირექტორის მოადგილე და სწორედ მას ვუკავშირებ ამ ფაქტს, სწორედ მის ქმედებას ვუკავშირებ ამ ყველაფერს," _ აცხადებს დაბა ნასაკირალის საჯარო სკოლის დირექტორი სპარტაკ გოგიტიძე.

თეა იოსელიანი, გურია