ეროვნული ბანკის პრეზიდენტის გიორგი ქადაგიძის ინფორმაციით, საშუალოვადიან პერსპექტივაში ლარის გაუფასურება მოსალოდნელი არ არის.

ამის შესახებ ქადაგიძემ ჟურნალისტებთან საუბრისას განაცხადა.

რაც შეეხება ახლოვადიან პერსპექტივას, ქადაგიძის ინფორმაციით, მიმდინარე რყევები მნიშვნელოვანწილად დაკავშირებულია იმ განცხადებებთან, რომელიც კეთდება მთავრობის წევრების მხრიდან.

„იმ ინფორმაციის გათვალისწინებით, რომელიც დღეს ჩვენ გვაქვს გაცვლითი კურსის გაუფასურებაზე მოქმედი ფაქტორები არის ამოწურული. საშუალოვადიან პერიოდში ლარის გაუფასურებაზე მოქმედი ფაქტორები სხვა თანაბარ პირობებში ამოწურულია. იმპორტის შემცირება, რომელიც ჩვენ მივიღეთ აპრილში, რომელსაც რა თქმა უნდა აქვს თავისი უარყოფით მხარეებიც, მაგრამ კურსზე გავლენის თვალსაზრისით არის ძალიან დადებითი, რადგან ის ამცირებს გაუფასურებაზე ზეწოლას. აპრილში იმპორტის 18%-იანი შემცირება ნიშნავს, რომ არსებული გაუფასურების დონე უკვე ახდენს კორექტირებას საგადამხდელო ბალანსზე. ზუსტად ამიტომ ჩვენ არ ველოდებით საშუალოვადიან პერსპექტივაში გაუფასურებას. რაც შეეხება მოკლევადიან მერყეობებს, აქ ძალიან დიდი გავლენა აქვს მოლოდინებს და იმ მოლოდინების ფორმირებას რაც ბაზარზე ხორციელდება, მათ შორის სხვადასხვა განცხადებებით“ , - ამბობს ქადაგიძე.