ავსტრიაში დაკარგული ქართველი გოგონა გარდაცვლილი იპოვეს

კრიმინალი - 18:11, 12 May, 2015

11622

ავსტრიის ქალაქ გრაინთან ახლოს მდინარე დუნაიში გარდაცვლილი ქართველი გოგონას ცხედარი იპოვეს. ინფორმაციას Nachrichten.at-ი ავრცელებს.

არსებული ინფორმაციით, სოფო ლოლაშვილი Au-pair-ის პროგრამით მუშაობდა. გავრცელებული ინფორმაციით, იგი მდინარეში დაიხრჩო.

ავსტრიული გამოცემა წერს, რომ სოფიკო ლოლაშვილმა ვენაში ოჯახი, სადაც ის ოპერად მუშაობდა, 29 აპრილს დღის მეორე ნახევარში დატოვა. გოგონა მატარებლით გაემგზავრა, სადაც ის გერმანული ენის კურსებს უნდა დასწრებოდა. თუმცა გოგონა ადგილზე არ მისულა. მისი ბოლო ადგილსამყოფელი გრაინში, 18:00 საათზე ფიქსირდება.

გამოცემისვე ცნობით, ჯერ-ჯერობით არ არსებობს არანაირი მტკიცებულება, საქმეში არ ფიგურირებს არც დამატებითი პირი.

შეგახსნებთ, რამდენიმე დღის წინ გავრცელდა ინფორმაცია, რომ ავსტრიაში ქართველი გოგონა დაიკარგა. მას სამართალდამცველები რამდენიმე დღის განმავლობაში ეძებდნენ. როგორც 7 მაისს გოგონას ოჯახის ახლობლებმა ,,ნიუპოსტს" განუცხადა, სოფო ლოლაშვილის დაკარგვის შესახებ მათ არაფერი იცოდნენ. ოჯახი ამბობდა, რომ სოფის წინა დღეს ესაუბრენ, ხოლო მისი და გავრცელებული ამბის შემდეგ ავსტრიაში ჩავიდა. ,,ნიუპოსტი" ამჯერადაც დაუკავშირდა სოფო ლოლაშვილის ახლობელს, თუმცა მან არანაირი კომენტარის გაკეთება არ ისურვა.

ინფორმაცია გოგონას გაუჩინარების შესახებ თავდაპირველად სოციალური ქსელით გავრცელდა.

,,ნიუპოსტი" მომხდართან დაკავშირებით საგარეო სქმეთა სამინისტროს დაუკავშირდა, თუმცა ამ დრომდე უწყების მხრიდან პასუხი არ მიგვიღია.