ონლაინ კამპანია - "17 მაისი არის ჰომოფობიასთან ბრძოლის დღე" (ფოტოკოლაჟი)

საზოგადოება - 17:35, 09 May, 2015

3209

ორგანიზაცია "ლგბტ საქართველო"-მ წამოიწყო ონლაინ-კამპანია, რომლის მიზანი 17 მაისის ნამდვილი მნიშვნელობის საზოგადოებისთვის გაცნობაა. ორგანიზაციის განცხადებით ბოლო წლების განმავლობაში ზოგიერთი სოციალური ჯგუფი ცდილობს ლგბტ თემის პრობლემებიდან ყურადღების გადატანა მოხდეს და ამის გამო 17 მაისს დაწესდა სხვადასხვა დღეობა და დაიგეგმა სხვადასხვა ღონისძებები.

"ლგბტ საქართველო" თავის ფეისბუქგვერდზე 17 მაისის, როგორც ჰომოფობიასთან და ტრანსფობიასთან ბრძოლის დღის ისტორიასაც წერს და ონლაინ კამპანიაში მონაწილეობის მსურველებს აქციაში მონაწილეობის პირობებს აცნობს:

„1990 წლის 17 მაისს ჯანდაცვის მსოფლიო ორგანიზაციამ ჰომოსექსუალობა ამოიღო დაავადებათა რეესტრიდან.

პირველად ეს დღე 2003 წელს აღნიშნეს, როგორც ჰომოფობიასთან და ტრანსფობიასთან ბრძოლის დღე. 2006 წლიდან ის იქცა საერთაშორისო დღედ. სწორედ ამიტომაც, ყოველი წლის 17 მაისი აღინიშნება მსოფლიოს მრავალ ქვეყანაში. ამ დღის დატვირთა და მნიშნელობა არის საზოგადოებისა და მთავრობის ყურადღების გამახვილება იმ პრობლემებზე, რომელიც აქვს ლგბტ თემს.

ამ კამპანიაში მონაწილეობის მიღება შეუძლია ნებისმიერ ადამიანს, ვისთვისაც მნიშვნელოვანია თანასწორობისა და თანაბარი უფლებების პრინციპი. ვისთვისაც მნიშვნელოვანია და ღირებულია თავად ადამიანი, და არა მისი ორიენტაცია. ასევე, მათთვის, ვისაც მიაჩნია, რომ ადამიანი არ უნდა იჩაგრებოდეს მისი განსხვავებულობის გამო.“- აღნიშნულია ორგანიზაციის მიმართვაში.

"ლგბტ საქართველო" კამპანიაში მონაწილეთა ფოტოებსაც აქვეყნებს, მათ შორის არიან სერიალ "ჩემი ცოლის დაქალების" მსახიობები, პარლამენტარი თამარ კორძაია და სხვა ცნობილი თუ არაცნობილი ადამიანები.