თბილისის მერი ევროკავშირის დღისადმი მიძღვნილ გამოფენას დაესწრო

საზოგადოება - 10:53, 09 May, 2015

1183

„ურთიერთობა, რომელმაც გაუძლო დროს“ - ევროკავშირის დღის აღსანიშნავად ეროვნულ გალერეაში გამართულ გამოფენას თბილისის მერი დავით ნარმანია დაესწრო.

როგორც მისასალმებელ სიტყვაში თბილისის მერმა აღნიშნა, გამოფენა ნათლად ასახავს ევროპასა და საქართველოს შორის არსებულ მრავალწლიან ურთიერთობებს, როგორც სოციალურ-კულტურულ სფეროში, ისე ეკონომიკის ცალკეული მიმართულებებით. „ეს კიდევ ერთხელ ხაზს უსვამს იმას, რომ ამ ისტორიული ურთიერთობებიდან გამომდინარე, ჩვენი მომავალი ადგილი სწორედ ევროპაშია“ - განაცხადა დავით ნარმანიამ.

ეროვნულ გალერეაში გამართული ფოტოგამოფენა საქართველოში ევროკავშირის ელჩმა იანოშ ჰერმანმა გახსნა. გამოფენის ორგანიზატორები არიან საქართველოში ევროკავშირის წარმომადგენლობა, პროექტი „ერთად შევეგებოთ ევროპას“ და საქართველოს ეროვნული არქივი.

საქართველოს ეროვნული არქივის კოლექციიდან გამოფენაზე წარმოდგენილი ადრეული ფოტოები იმ ადამიანების ისტორიას ასახავს, რომლებიც ქვეყნის განვითარების მომავალს ევროპული ღირებულებების კონტექსტში ხედავენ. მე-20 საუკუნის შუა და გვიანი პერიოდის ევროპულ-ქართული კულტურულ პოლიტიკური მიმოსვლის ქრონოლოგიას პრესის ფოტოგრაფები გადმოსცემენ.