სავალუტო რეზერვი ჩემი და ეროვნული ბანკის საკუთრება არაა, არ ვაპირებთ განიავებას- ქადაგიძე

ბიზნესი & ეკონომიკა - 18:24, 08 May, 2015

2255

ეროვნულ ბანკში სავალუტო ფონდის წარმომადგენლებთან შეხვედრის დასრულების შემდეგ სებ-ის პრეზიდენტმა ჟურნალისტებთან ეროვნული ვალუტის მდგომარეობაზე და ლარის სტაბილურობასთან დაკავშირებით ეროვნული ბანკის ფუნქციებზე ისაუბრა.

ქადაგიძის განცხადებით, საშუალოვადიან პერიოდში ლარის კურსის კიდევ უფრო გაუფასურება მოსალოდნელი არ არის.

„თუ გვაქვს მეტი სავალუტო შემოდინება, კურსს აქვს გამყარების მიმართულება, თუ გვაქვს ნაკლები შემოდინება კურსს აქვს გაუფასურების მიმართულება. ეს არის ანბანური ჭეშმარიტება ეკონომიკის. კურსთან დაკავშირებით შემიძლია დადებითი მონაცემები გითხრათ კურსზე გავლენასთან დაკავშირებით, ეს არის აპრილის თვის წინასწარი მაჩვენებლები იმპორტის, რომელიც მნიშვნელოვნადაა შემცირებული. ეს კი ნიშნავს იმას, რომ უკვე არსებულმა გაუფასურებამ გავლენა მოახდინა იმპორტზე და საგადასახდელო ბალანსის კორექტირება დაწყებულია, რაც ნიშნავს იმას რომ სხვა თანაბარ პირობებში ადგილი არ უნდა ჰქონდეს გაუფასურებას. რა თქმა უნდა მოკლევადიან პერიოდში მერყეობას ადგილი ყოველთვის ჰქონდა და ექნება."

საქართველოს ეროვნული ბანკის პრეზიდენტის განცხადებით ბანკი სავალუტო რეზერვების განიავებას არ აპირებს:

"არ ვაპირებთ სავალუტო რეზერვების განიავებას. ეს არის არასწორი გადაწყვეტილება და ხშირ შემთხვევაში დამღუპველი, რაც მსოფლიო ისტორიაში არაერთხელ დადასტურებულა. მინდა ხაზი გავუსვა იმ გარემოებას რომ სავალუტო რეზერვი არ არის ჩემი და ეროვნული ბანკის საკუთრება. ეს არის ჩვენი მოქალაქეების და შვილების მატერიალური დოვლათი".- განაცხადა ქადაგიძემ.

_{ნინო ზედგენიძე}