რეზო ჩხეიძის სახით მსოფლიომნიშვნელობის ადამიანი დავკარგეთ

რეზო ჩხეიძის სახით მსოფლიომნიშვნელობის ადამიანი დავკარგეთ - თბილისის მერი

საზოგადოება - 14:36, 07 May, 2015

1778

თბილისის მერი - დავით ნარმანია, სამების საკათედრო ტაძარში - რეზო ჩხეიძის სამოქალაქო პანაშვიდზე იმყოფებოდა და კინორეჟისორის ოჯახის წევრებს მიუსამძიმრა.
დავით ნარმანიამ აღნიშნა, რომ მზადაა აღასრულოს დანაპირები, რომელიც რეზო ჩხეიძეს მისცა და მხარი დაუჭიროს ქართული ხელოვნების წინსვლას.

"უდიდესი ადამიანი დავკარგეთ არა მარტო ჩვენ, არამედ მთელმა მსოფლიომ. ძალიან მდიდარია ის შემოქმედება, რაც მან დაგვიტოვა და ძალიან დიდია ის ღვაწლი, რაც მას მიუძღვის ჩვენი ქვეყნის წინაშე. ეს უმთავრესი წინაპირობაა იმისა, რომ არამარტო ჩვენმა თაობამ, არამედ მომავალმა თაობებმაც არ დაივიწყონ ბატონი რეზოს სახელი. მე პირადად ძალიან კარგად მახსოვს მისი შემოქმედება, კარგად მახსოვს წინასაარჩევნო პერიოდი, სულ რაღაც ერთი წლის წინ, როდესაც ინტელიგენციის წინაშე შეკრებილებს მოგვმართა და პირადად მე მომმართა, რომ ქართულ კინოს და ხელოვნებას დავდგომოდით გვერდში და ეს ყველაფერი რაც გადასარჩენია, გადაგვერჩინა" - განაცხადა დავით ნარმანიამ.

შეგახსენებთ, რომ ლეგენდარული ქართველი კინორეჟისორი - რეზო ჩხეიძე, 89 წლის ასაკში, 3 მაისს გარდაიცვალა, ამ წუთებში - სამების საკათედრო თაძარში, სამოქალაქო პანაშვიდი მიმდინარეობს, რომელიც 15:00 საათზე დასრულდება და მის ცხედარს დიდუბის პანთეონში გადაასვენებენ.