გურია ფოლკლორის გარეშე... - ვის ხარჯზე იჭერენ ქამრებს?!

საზოგადოება - 16:20, 06 May, 2015

1816

,,იუბილის გადახდას ველოდებოდი, მეგონა ყოველშემთხვევაში, პატივისცემით მომოწევდა სახლში წასვლა, მარა გაგდებით მომილოცეს”- ანსამბლ ,,იადონის” უხუცესმა წევრმა ,,გურიის მოამბესთან” თავისი გულისტკივილი, დღეს კულტურის ცენტრის დირექტორის მიერ მათთვის გაცნობილი გადაწყვეტილების შემდეგ დააფიქსირა, როცა ორი უძველესი ანსამბლი ,,ელესა” და ,,იადონი” დაფინანსების გარეშე დატოვეს.

,,გურია, ფოლკლორის ცენტრია, გურული კრიმანჭულის გარეშე ეს მხარე ვის წარმოუდგენია? გიორგი სალუქვაძის მიერ შექმნილი ანსამბლია ,,იადონი", 1968 წლის მერე მოვდივართ და ახლა გვეუბნებიან დაფინანსება შეგიწყდათო. წინასაარჩევნოდ, ბეგი სიორიძე გვპირდებოდა, კულტურის სფერო უნდა ავაღორძინოთ ადგილზე და ხელფასების გაორმაგებაზე იყო საუბარი, ყურადღებასა და პატივისცემაზე, ახლა? უბოდიშოდ გამოგვისტუმრეს. 50 ათასი დაიზოგა ბიუჯეტშიო, უხუცესების ხარჯზე შემოიჭირეს ქამრები. 90-იან წლებში ფეხით დავდიოდით ქალაქში, რომ ანსამბლი შეგვენარჩუნებინა, 40 წელიწადი უხელფასოდ ვიარეთ”?-გვეუბნება 87 წლის მოსე სვანიძე.

ანსამბლის რამდენიმე წევრი, რედაქციაში სტუმრობისას ხაზს მთავარს, მიღებული გადაწყვეტილებით მათთვის შელახულ ღირსებას უსვამდნენ : ,,არ ვსაუბრობთ იმაზე, რომ ის მიზერული 128 ლარი, რასაც ხელზე ვიღებდით, ვეღარ ავიღებთ, ჩვენ ღირსება გვაქვს შელახული. არც ასაკს სცეს პატივი, ის ანსამბლები რომლებიც დატოვეს, ახალშექმნილია და 4 სიმღერის მეტი არაფერი არ იციან, რა კრიტერიუმით შეარჩიეს ვინ უნდა დარჩენილიყო და ვინ არა? ანსამბლის ხელმძღვანელი რეანიმაციაში წევს, გულის ოპერაცია გაიკეთა, არც აცალეს კაცს ჩამოსულიყო, ამის ადამიანობაც არ დაურჩათ. კობა ბანძელაძესთან არაფერი არ გვაქვს პრეტენზია, მას არც არაფერი შეეძლო გაეკეთებინა. ბეგისთან შესვლას და დალაპარაკებას კი აზრი არ ჰქონდა, ეს უკვე გადაწყვეტილი ჰქონდა და ჩვენ რომ პატივი არ გვცა იმაშიც გამოიხატა, რომ არც იკადრა დალაპარაკება და მოსვლა ჩვენთან. რა არის იცით? მისი ახლობლები და მეგობრები არ ვიყავით ამ ანსამბლში და ამიტომ დავრჩით გარეთ. კობამ გვითხრა, იანვრამდე იარეთ უხელფასოდ და მერე გამოჩნდება რამეო, ამის ღირსები ვიყავით ჩვენ, რომ ასე უპატივცემულოდ მოგვქცეოდნენ” ?–გვიხსნის ანსამბლის წევრი ქალბატონი, ნონა ხავთასი.

ვახტანგ გობრონიძე, ანწამბლის ახალგაზრდა წევრი: 'ყველაზე მეტად გვაინტერესებს, რა კრიტერიუმით შერაჩიეს ის ორი ანსამბლი, რომელიც დატოვეს. ჩაატარონ კონკურსი და მოუსმინონ ყველა ანსამბლს, თავადვე ნახავენ ვინ მღერის ფოლკლორს, კრიმანჭულს, რომელ ანსამბლს აქვს ყველაზე დიდი წვლილი შეტანილი აქ კულტურის განვითარებაში. რა თაობები გაუზრდია ,,იადონს", ეს ძალიან კარგად იციან, მაგრამ...

აღსანიშნავი ალბათ ისიც არის, რომ გასულ წელს, ქალაქის მერმა ოზურგეთი ფოლკლორის ქალაქად გამოაცხადა და მასშტაბური ღონისძიებაც მიუძღვნა მის როგორც მაშინ შეფასდა, განსაკუთრებული დათვირთვისა და მნიშვნელობის ინიციატივას.

რამდენიმე წუთში აღნიშნულ თემაზე მოგაწვდით მეორე მხარის კომენტარს და ვრცლად ანსამბლის წევრთა შეფასებებს.