"ქართველები ცოტა უცნაური ადამიანები ვართ"- პატრიარქი

საზოგადოება - 14:07, 06 May, 2015

2706

საქართველოს კათოლიკოს-პატრიარქმა ილია მეორემ გიორგობის დღესასწაულთან დაკავშირებით ქაშუეთის ტაძარში წირვა ჩაატარა. პატრიარქმა წირვის დასრულების შემდეგ წმინდა გიორგის ღვაწლზე და მის მიმართ ქართველი ქრისტიანების განსაკუთრებულ დამოკიდებულებაზე ისაუბრა.

ილია მეორის თქმით ქართველი ადამიანი ცოტა უცნაურია, რადგან მხოლოდ ქართველს აქვს ნათქვამი „ეძიებდეთ ქრისტესთვის სიკვდილს“, პატრიარქის შეფასებით ამ სიტყვებში ქართული სული და გონება ჩანს.

„ქართველი ადამიანები ცოტა უცნაურები ვართ. დავით აღმაშენებელი, ეს დიდებული მეფე, ამბობს, - გულზე დამადგით ფეხი ყოველმანო. ასეთი რამ არც ერთ მეფეს კი არა, რიგით ადამიანს არ უთქვამს. მეორე მეფე ვახტანგ გორგასალი ამბობს: ეძიებდე ქრისტესთვის სიკვდილსო. ესეც არ უთქვამთ. ამბობენ: წამებას გაუძელითო, მაგრამ შენ რომ ეძიებდე სიკვდილს ქრისტესთვისო, არა. არაჩვეულებრივი გამოთქმაა. ამაში ჩანს ქართული სული, ქართული გონება და ქართული სულიერება“- აღნიშნა ილია მეორემ.

პატრიარქის თქმით, როდესაც ადამიანს გონია, რომ ღმერთმა მარტო დატოვა სწორედ მაშინ არის ღმერთი მასთან ყველაზე ახლოს. ამასთან დაკავშირებით ილია მეორემ წმინდა გიორგის წამების მაგალითი გაიხსენა, როდესაც იგი იმპერატორ დიოკლეტიანეს ბრძანებით აწამეს. სისხლისგან დაცლილმა გიორგიმ ღმერთს შესთხოვა შემწეობა და პასუხად მიიღო: - ნუ გეშინია გიორგი, მე შენთან ვარ.

„ეს სიტყვები გვესმის მთელი ცხოვრება ჩვენ. როცა ვფიქრობთ, რომ ღმერთმა დაგვტოვა და აღარ გვეხმარება, მაშინ ყველაზე ახლოს არის ჩვენთან“, - განუცხადა ილია მეორემ ეკლესიაში შეკრებილ მრევლს.

„წმინდა გიორგი საქართველოს სიმბოლო და მფარველია. მუდამ იცავდა, იცავს და მომავალშიც დაიცავს საქართველოს. ეს დღე არის უდიდესი დღესასწაული. ჩვენს წინაშეა ორი პიროვნება, წმინდა გიორგი და მისი მწამებელი იმპერატორი დიოკლეტიანე. დიოკლეტიანე გიორგის თავის მემკვიდრედ თვლიდა, მაგრამ ის სიყვარული სიძულვილში გადაუვიდა, როდესაც გიორგიმ ქრისტე იწამა. დიოკლეტიანეს სწამდა, რომ სახელმწიფოს მხოლოდ წარმართები გადაარჩენდნენ“, - განაცხადა პატრიარქმა.