ზუგდიდის რაიონულ სასამართლოსთან აქცია მიმდინარეობს

საზოგადოება - 11:33, 06 May, 2015

1425

ზუგდიდიდს რაიონული სასამართლოს შენობასთან აქცია მიმდინარეობს. აქციას, ქურდულ სამყაროსთან კავშრის ბრალდებით დაკავებული - 10 პატიმრის, ოჯახის წევრები მართავენ.
მათი განცხადებით, აღნიშნული პირების დაკავება უსამართლოდ მოხდა. როგორც "ნიუპოსტთან" პატიმართა ახლობლებმა განაცხადეს, სასამართლოზე ცრუ მოწმეებად მოყავთ პოლიციის ის თანამშრომლები, რომლებიც დაკავებაში საერთოდ არ მონაწილეობდნენ, ესენი არიან დღეს მოქმედი განყოფილებების და ქვეგანყოფილებების უფროსები.
როგორც აქციის წევრები განმარტავენ, წინა სასამართლო პროცესზე მოყვანილი იყო ზაზა ლატარია, რომელიც გახლავთ სამეგრელო-ზემო სვანეთის მხარის კუდის ყოფილი უფროსი, დღეს კი სამხარეო პოლიციის ერთ-ერთი განყოფილების უფროსია, იგი დაკავებაზე საერთოდ არ იმყოფებოდა, მიუხედავად ამისა, მან ჩვენება მისცა, რომელიც ცრუ და არასწორია.
"ნიუპოსტის" ინფორმაციით, აღნიშნული პირები დაკავებისას, ტელევიზიებმა დააფიქსირეს კადრები, რომლებიც ასახავს თუ როგორ უდებენ დაკავებულებს მარიხუანას, რა დროსაც პოლიციელებს მარიხუანას შეკვრა ძირს დაუვარდათ. სწორედ ამის გამო, მარიხუანა გაიგზავნა ექსპერტიზაზე, სადაც პოლიციელების თითის ანაბეჭდები დაფიქსირდა.
ოჯახის წევრების განცხადებით, დაკავებულებს ნარკოტიკული საშუალებები ჩაუდეს, ხოლო სადაც ეს ვერ მოახერხეს იქ „შპრიცით“ დადეს ნარკოტიკი.

როგორც ერთ-ერთი დაკავებულის, გიორგი კარბაიას დედა - მარინა კარბაია აცხადებს, იგი პროტესტის ნიშნად არ ესწრება სასამართლო პროცესს და უარყოფს ნარკოტიკული ნივთიერებების გიორგი კარბაიაზე კუთვნილების ფაქტს.

პატიმარ გერგედავა გელას მშობლები კი აცხადებენ, რომ ვინაიდან აყვანის დროს ნარკოტიკული საშუალება ძირს დაუცვივდათ და ვერ მოახერხეს შიგნით შეტანა, ამიტომ გარეთ დადეს და ახსნეს ისე, თითქოს შიგნიდან ამოიღეს.

ცაცხუნაშვილი ლაშას ახლობლების განმარტებით, მას ნარკოტიკულ საშუალებებთან შეხება არასდროს ჰქონია და შემოწმებისას, მსგავსი ნივთიერებები, არც აღმოჩნდა მის ორგანიზმში.

როგორც ოჯახის წევრები აცხადებენ, ისინი აპირებენ, რომ ფეხით წავიდნენ პარლამენტთან, რათა უფლებათა დამცველს სთხოვონ რეაგირება ასეთ ფაქტებზე, მიუხედავად იმისა რომ მას ამ თხოვნით უკვე ბევრჯერ მიმართეს, თუმცა რეაგირება არ მომხდარა.

რუსუდან ქიმერიძე