ფიროსმანის მირზაანის კოლექცია წინანდალში პირველად გამოიფინა

საზოგადოება - 16:23, 04 May, 2015

2569

ალექსანდრე ჭავჭავაძის სახლ-მუზეუმში (წინანდალი) ნიკო ფიროსმანის ნამუშევრების გამოფენა გაიხსნა. ამ სახით რეტროსპექტივა კულტურული მემკვიდრეობის დაცვის ეროვნული სააგენტოს პროგრამის "მუზეუმების კოლექციიდან" ფარგლებში მოგზაურობს - კოლექცია თბილისის ხელოვნების სასახლეში, შემდეგ ქუთაისში იყო წარმოდგენილი. ნიკო ფიროსმანის მირზაანის კოლექციის გამოფენა კი პირველად ეწყობა წინანდალში. წარმოდგენილია ფიროსმანის 13 ნახატი, მხატვრის სხვადასხვა პერიოდის გამოფენის აფიშები და პაბლო პიკასოს გრაფიკული ნამუშევარი "ნიკო ფიროსმანაშვილის პორტრეტი".

გამოფენის გახსნას ფართო საზოგადოება დაესწრო. საფრანგეთიდან საგანგებოდ მოწვეულმა სიმებიანმა კვარტეტმა “არპეჯიონემ” ფრანც შუბერტის, გია ყანჩელის და დიმიტრი შოსტაკოვიჩის ნაწარმოებები შეასრულა. ამით წინანდლის ისტორიული კომპლექსში საგაზაფხულო სეზონის გაიხსნა.

ალ.ჭავჭავაძის სახლ-მუზეუმს არაერთი მნიშვნელოვანი და საინტერესო კულტურული ღონისძიება გაუმართავს წინანდალში. მათ შორის იყო სალვადორ დალის, პიტ მონდრიანის, ელენე ახვლედიანის, სერგო ქობულაძის, შურა ბანძელაძის, დავით კაკაბაძის ნამუშევრების გამოფენები.

აქ ჩამოსულ სტუმარს მუზეუმი თავის მუდმივმოქმედ ექსპოზიციასთან ერთად მაისის განმავლობაში ფიროსმანის მირზაანის კოლექციით უმასპინძლებს 31 მაისის ჩათვლით. გამოფენა კომპანია „სილქნეტისა“ და სილქ როუდ ჯგუფის პატრონატით მიმდინარეობს.

წინანდლის ისტორიული კომპლექსი აერთიანებს სახლ-მუზეუმს, ულამაზეს ბაღს და ენოთეკას. მუზეუმში მოქმედებს სპეციალური შეთავაზებები ღვინის ტურით.