ახალგაზრდა დასის თვალით დანახული "ანტიგონე"

კულტურა - 11:25, 03 May, 2015

1564

სამშაბათს, 5 მაისს ახალგაზრდული თეატრი "მუზა" თავის პირველ პრემიერას გამართავს 24-ე საჯარო სკოლის სააქტო დარბაზში. ახალგაზრდული დასი პირველად წარდგება მაყურებლის წინაშე ჟან ანუის პიესით “ანტიგონე”.
საქართველოში “ანტიგონე” პირველად არ იდგმება. ბოლო წლების ყველაზე ცნობილი დადგმა თემურ ჩხეიძეს ეკუთვნის, მისეული “ანტიგონეს” პრემიერა მარჯანიშვილის თეატრში 2000 წლის 30 სექტემბერს გაიმართა.
რატომ არის დღეს ეს პიესა საინტერესო? იმიტომ რომ ის ფიზიკურად უღონო, მაგრამ სულიერად მტკიცე პატარა გოგონას ბრძოლას ეხება სასტიკი სისტემის წინააღმდეგ. რეჟიმის მეთაური, მეფე კრეონტი შეუბრალებელია: ის ანტიგონეს დახოცილი ძმების დამარხვის ნებას არ აძლევს. მაგრამ ანტიგონესთვის ზნეობრივი კანონი უფრო მაღლა დგას, ვიდრე რეჟიმის შიში. ის მარხავს ძმებს და სიკვდილით ისჯება კრეონტის მიერ. ანტიგონე კვდება, მაგრამ ის უკვდავია, როგორც უსამართლობისადმი წინააღმდეგობის სიმბოლო.
აქამდე ანტიგონეს, როგორც წესი “დიდები” თამაშობდნენ პროფესიონალურ თეატრებში. ახალგაზრდული თეატრის მსახიობებმა სცადეს ქართულ თეატრალურ სივრცეში პირველად შემოიტანონ პროფესიონალური ახალგაზრდული დრამა, რომელიც განსაკუთრებით დიდ ბრიტანეთშია განვითარებული.
ახალგაზრდა მსახიობები რამდენიმე თვეა დიდი ქართველი რეჟისორის, შალვა გაწერელიას მოწაფის, ახალგაზრდა რეჟისორ გიორგი ჩახვაძის ხელმძღვანელობით გულმოდგინედ ემზადებიან სპექტაკლის პრემიერისთვის. თეატრმა ამ დროის განმავლობაში მრავალი გაჭირვება გამოიარა ფინანსური, მატერიალური თუ ადამიანური თვალსაზრისით, მაგრამ საბოლოოდ, დასმა მაინც მოახერხა ამა წლის 5 მაისს პრემიერით წარდგეს მაყურებლის წინაშე.
სპექტაკლისთვის მზადებამ ახალგაზრდა მსახიობების ცხოვრებაც შეცვალა. მათ ახლა უფრო კარგად ესმით, რომ ზნეობრივი და მოქალაქეობრივი ვალდებულებები არა მხოლოდ დიდებს, არამედ მათაც ეხებათ. აქ კი მათი მაგალითი პატარა და უდრეკი ანტიგონეა.