შინაგან საქმეთა სამინისტრო გურჯაანში პოლიციელების მხრიდან მოქალაქის ცემას არ ადასტურებს. როგორც უწყებაში განმარტავენ, სავარაუდოდ ნასვამი მოქალაქე სამართალდამცველების კანონიერ მოთხოვნას არ დაემორჩილა. პოლიციამ მამაკაცს ალკოტესტზე შემოწმება მოსთხოვა, რაზეც მან უარი განაცხადა და გაიქცა.

გავრცელებული ინფორმაციით, გურჯაანში, 9 აპრილის ქუჩაზე მოქალაქე ზვიად კობიაშვილს პოლიცია ფიზიკურად ჯერ ეზოში შემდეგ კი სახლში გაუსწორდა. ოჯახის ვერსიით, კობიაშვილსა და პოლიციელებს შორის დაპირისპირება ავტომანქანის დოკუმენტების მოთხოვნის შემდეგ დაიწყო.

როგორც ისინი ამბობენ, დაპირისპირება ჯერ სიტყვიერი შეურაცხყოფით დაიწყო, რაც ფიზიკურ ანგარიშსწორებაში გადაიზარდა.

არსებული ინფორმაციით, კობიაშვილის ოჯახს მომხდართან დაკავშირებით შსს-ს გენინსპექციისთვის ამ დრომდე არ მიუმართავს.