"ნიუპოსტის" ინფორმაციით, ზუგდიდში უმრავლესობის წევრებს გია ვოლსკის და ეკა ბესელიას ადგილობრივები აქციით ხვდებიან. როგორც ცნობილია, დეპუტატები მოსახლეობასთან და ადგილობრივი თვითმმართველობის ხელმძღვანელ პირებთან შეხვედრას აპირებენ. მოსახლეობის პროტესტი კი იმან გამოიწვია, რომ შენობაში სადაც ბესელია-ვოლსკი უნდა მივიდნენ, ხალხს არ უშვებენ. აქციაზე სამართალდამცველებმა რამდენიმე აქტივისტი დააკავეს, თუმცა ისინი პოლიციის შენობაში ჯერჯერობით არ გადაუყვანიათ.

შენობაში სოფლების გამგებლები იმყოფებიან, ასევე ადგილზე არიან მათი ოჯახის წევრები. როგორც აქციაზე შეკრებილები ამბობენ, უბრალო მოსახლეობას დეპუტატებთან შეხვედრის უფლებას არ აძლევენ.

ცნობილია, რომ ეკა ბესელია უკვე ჩასულია ადგილზე, თუმცა შენობაში შესვლას ვერ ახერხებს, რადგან ელოდება როდის გახსნიან სამართალდამცველები დერეფანს, რომ შენობაში შესვლა მოახერხოს.