მშობელთა საინიციატივო ჯგუფის ორგანიზებით განათლების სამინისტროსთან გამაფრთხილებელი აქცია გაიმართება. ისინი "ზოგადი განათლების შესახებ" კანონში დაგეგმილ ცვლილებებს აპროტესტებენ, რომლის მიხედვით ზოგადი განათლების დაწყებით საფეხურზე სწავლის დაწყების ასაკი ექვსი წელია.

როგორც მშობელთა საინიციატივო ჯგუფში აცხადებენ, აქციის მონაწილეები საპარლამენტო უმრავლესობას მიმართვას გაუგზავნიან:

„საპარლამენტო უმრავლესობაზე ზეწოლას ახორციელებს აღმასრულებელი ხელისუფლება, რადგან ასეთი მოსწავლეების რაოდენობა 20000-მდეა. მათ მიერ შეთავაზებული ვარიანტით სახელმწიფო ბიუჯეტი დაზოგავს 8 მლნ-მდე ლარს. ეს გადაწყვეტილება უარყოფითად აისახება ბავშვების სასკოლო მოტივაციის ხარისხზე. ამავდროულად, პრობლემას შეუქმნის ოჯახებს, მოახერხონ შვილების სოციალური აქტივაცია. მოვითხოვთ, საპარლამენტო უმრავლესობამ კენჭისყრის პროცესში გაითვალისწინოს მათი პოზიცია, რომელსაც არ გააჩნია არანაირი პოლიტიკური მოტივაცია", - აცხადებენ მშობელთა საინიციატივო ჯგუფში.

"ზოგადი განათლების შესახებ" კანონში დაგეგმილი ცვლილებების მიხედვით, ზოგადი განათლების დაწყებით საფეხურზე სწავლის დაწყების ასაკი ექვსი წელია.

აქცია დღეს, 12:00 საათზე მოეწყობა. აქციაზე მიწვეული არიან კანონპროექტის ინიციატორი, ფსიქოლოგები, არასამთავრობო ორგანიზაციები და საზოგადოების ცნობილი სახეები.