ლაითურელების საპროტესტო აქციას გუბერნატორის მოვალეობის შემსრულებელი უსაფუძვლოს უწოდებს

საზოგადოება - 12:38, 25 Apr, 2015

1320

ლაითურელი გლეხები დაბის ცენტრში დღეს საპროტესტო აქციას მართავენ და მათთვის მიწების გადაცემას მოითხოვენ.
აქციაზე მუნიციპალიტეტის გამგებელი მერაბ ჭანუყვაძე და გუბერნატორის მოვალეობის შემსრულებელი ქეთი მოისწრაფეშვილი მივიდნენ, მოლაპარაკებები მოსახლეობის მხრიდან, ხმაურისა და დაძაბულობის ფონზე მიმდინარეობს.
მოისწრაფეშვილი მიმდინარე აქციას უსაფუძვლოს უწოდებს და ამბობს, რომ ორგანიზატორებს შეცდომაში ჰყავთ მოსახლეობა შეყვანილი: "მე მქონდა რამდენიმე დღიანი მოლაპარაკებები "ჯეო პლანტის" ხელმძღვანელობასთან დაბის მოსახლეობის მოთხოვნების გათვალისწინებით და ისინი თანახმა არიან, რომ მიწა მიყიდონ მსურველებს 55 თეთრად, თანხის დაფარვა ეტაპობრივად შეეძლებათ. ტყუილია, როცა აქ ისმის მოწოდებები, თითქოს მიწა არ გაიყიდება. აქცია მიმაჩნია უსაფუძვლოდ და ორგანიზატორების მხრიდან მოსახლეობა შეცდომაშია შეყვანილი"- განაცხადა გუბერნატორის მოვალეობის შემსრულებელმა.თავის მხრივ მოსახლეობა ადგილობრივ ხელისუფლებას ტყუილ დაპირებებში ადანაშაულებს , მათი მტკიცებით, მიწის შეღავათაინ ფასებში ყიდვისა და მოხმარების საშუალებას მათ კერძო კომპანია არ მისცემთ.
შეგახსენებთ, საუბარია 160 ჰექტარ მიწის ფართობზე, რომელსაც 2 კერძო კომპანია - "ჯეო პლანტი" და "ვან რიკი" 2007 წელამდე იჯარით ფლობდნენ, შემდეგ კი, მოსახლეობის თქმით, 1 კვმ 35 თეთრად შეიძინეს, ახლა კი "ვან რიკი" 1 კვმ-ს 55, ხოლო "გეო პლანტი" 47 თეთრად ყიდის. ადგილობრივები ამბობენ, რომ ამ თანხის გადახდას ვერ შეძლებენ. `ვან რიკის" საკუთრებაში არსებული ტერიტორიების ნაწილი მოსახლეობამ თვითნებურად შეღობა, რასაც დაპირისპირება მოჰყვა. როგორც ადგილობრივები აცხადებენ, თუ მათ მოთხოვნებზე ადგილობრივი ხელისუფლების მხრიდან არ იქნება კონკრეტული გადაწყვეტილება მიღებული, ისინი მომდევნო აქციას დედაქალაქში, კანცელარიასთან გამართავენ. დაბაში 1250 კომლი ცხოვრობს, მათგან 470 ოჯახი აჭარის მაღალმთიანეთიდან ჩასახლებულია. მოსახლეობამ მასშტაბური საპროტესტო აქცია გასულ კვირასაც გამართა.

ავტორი თეა იოსელიანი