დღეიდან პირველკლასელთა რეგისტრაცია დაიწყო, თუმცა ამ დრომდე გაურკვეველია შეძლებენ თუ არა 5 წლამდე ბავშვები სწავლის დაწყებას. აღნიშნული ინიციატივა პარლამენტში უმცირესობის დეპუტატმა - კობა სუბელიანმა დააყენა, რაც განათლების მინისტრმა თამარ სანიკიძემ - ნაციონალური მოძრაობის დაგეგმილ პროვოკაციად შეაფასა.

„ეს ინიციატივა, რაც ნაციონალური მოძრაობის მხრიდან წამოვიდა, იყო კარგად დაგეგმილი პროვოკაცია. მე დიდი იმედი მაქვს, რომ პირველ რიგში ბავშვების უფლებები წამოიწევა წინა პლანზე და პარლამენტი ამაზე გააგრძელებს მსჯელობას. ამჟამად არსებობს მოქმედი კანონმდებლობა, რის ფარგლებშიც ჩვენ უნდა ვიმოქმედოთ. ჩვენი მხრიდან არ იქნება არც ერთი დაზარალებული მოსწავლე“ - აცხადებს თამარ სანიკიძე.

შეგახსენებთ, რომ საჯარო სკოლებიში 5 წლის ასაკიდან ბავშვის მიღების ინიციატივა, ერთიანი ნაციონალური მოძრაობის წევრებმა წამოაყენეს და პირველი მოსმენის ფარგლებში, კანონპროექტი - მმართველი უმრავლესობის წინააღმდეგობის მიუხედავად, 62 ხმით, 7-ის წინააღმდეგ მიიღეს.

რუსუდან ქიმერიძე