დაავადებათა კონტროლისა და საზოგადოებრივი ჯანმრთელობის ეროვნულ ცენტრში, ევროპის იმუნიზაციის კვირეულის აღსანიშნავად პრეკონფერენცია გაიმართა „ აცერი და დაიცავი“.

პრესკონფერენციას, სამედიცინო სექტორის წარმომადგენლების გარდა, დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორი ამირან გამყრელიძე, ჯანდაცვის სამინისტროს ჯანდაცვის დეპარტამენტის უფროსი მარინა დარახველიძე, ამერიკის დაავადებათა კონტროლის ეროვნული ცენტრის წარმომადგენელი ჯულიეტ მორგანი, დედაქალაქის საკრებულოს ჯანდაცვისა და სოციალურ საკითხთა კომისიის თავმჯდომარე ირაკლი ფავლენიშვილი, თბილისის მერიის ჯანდაცვისა და სოციალური საქალაქო სამსახურის უფროსი გელა ჩივიაშვილი და ჯანმრთელობის მსოფლიო ორგანიზაციის საქართველოს ოფისის უფროსი რუსუდან კლიმიაშვილი დაესწრნენ.

პრესკონფერენციაზე ამირან გამყრელიძემ აღნიშნა, რომ აცრა საუკეთესო საშუალებაა მომავალი თაობების ინფექციისგან დაცვისათვის.

"საქართველოში ყველა ვაქცინა, რომელიც სახელმწიფოს შემოაქვს, უფასო, მაღალკვალიფიციური და სერტიფიცირებულია ჯანმრთელობის მსოფლიო ორგანიზაციის მიერ, აბსოლუტურად უვნებელია გვერდითი მოქმედებების გარეშე და სხვადასხვა ინფექციური დაავადების წინააღმდეგ მაღალი დაცვის პროცენტი აქვს" - განაცხადა ამირან გამყრელიძემ.

როგორც ცნობილია, ევროპის იმუნიზაციის კვირეულში, სხვადასხვა ტიპის აქტივობაა დაგეგმილი. მათ შორის, თბილისის სახელმწიფო სამედიცინო უნივერსიტეტში სოციალურად დაუცველი მრავალშვილიანი ოჯახებისათვის კონცერტი და საჩუქრების გადაცემის ცერემონია გაიმართება - 28 აპრილს, 17:00 საათზე.

რუსუდან ქიმერიძე