მარნეულში მასწავლებელი მოსწავლეებს სექსუალური შინაარსის სურათების დათვალიერებას აიძულებდა

საზოგადოება - 13:54, 20 Apr, 2015

11956

სოფელ აზიზქენდში ჩასული მასწავლებელი ირმა შველაძე, რომელსაც მოსწავლეებისთვის ქართული ენის შესწავლა ევალება, როგორც ადგილობრივები აცხადებენ, მოსწავლეებზე ძალადობს და მათზე ფიზიკურ და ფსიქოლოგიურ ზეწოლას ახორციელებს. ამის შესახებ გაზეთი „პრაიმტაიმი“ წერს.

მოსწავლეები ირმა შველაძის სასწავლო პროცესიდან ჩამოშორებას ითხოვენ. გამოცემასთან საუბრისას ერთი-ერთი მოსწავლის მშობელი აცხადებს, რომ მასწავლებელი მოსწავლეს გაკვეთილზე უხერხულ კითხვებს უსვამდა.
„ერთხელ ჩემმა შვილმა მომიყვა თავის კლასელზე, რომლის მამაც რუსეთში მუშაობს და დიდ ნაწილს სწორედ იქ ატარებს. როდესაც ამ ბავშვის მამა ჩამოვიდა რუსეთიდან, მეორე დღეს ირმა მასწავლებელმა მთელი კლასის თანდასწრებით ჰკითხა მოსწავლეს, გუშინ საღამოს მამაშენი და დედაშენი რით იყვნენ დაკავებულებიო“,-ამბობს ერთ-ერთი მოსწავლის მშობელი. მეხუთეკლასელის მშობლის ასკაროვი ზუფულუგოვის განცხადებით კი, შველაძე მოსწავლეებს სექსუალური შინაარსის ფოტოებს ათვალიერებინებდა. „ცუდ სურათებს ათვალიერებინებდა გაკვეთილზე ბავშვებს. 18+ ვგულისხმობ“, – ამბობს მშობელი.

სკოლის ერთ-ერთი მასწავლებლის განცხადებით კიირმა შველიძე არა მარტო მოსწავლეებს აყენებს შეურაცხყოფას, არამედ მასწავლებლებსაც არ ინდობს. ის იხსენებს ფაქტს, როდესაც სამასწავლებლოში მამაკაცი მასწავლებლები ისხდნენ და ირმა შველიძემ კი მათ სიტყვიერი შეურაცხყოფა მიაყენა:
„ხუთი-ექვსი მასწავლებელი ვისხედით სამასწავლებლოში, შემოვიდა ირმა შველიძე და გვითხრა, თქვენში მამაკაცი არცერთი არ არისო. რა შუაში იყო ან რას გულისხმობდა, ვერ გავიგეთ“- აცხადებს ირმა შველიძის კოლეგა .

სკოლის მოსწავლის თელმან გურბანოვის თქმით, გაკვეთილზე დაგვიანებისა და ქართული სიტყვის შეცდომით წარმოთქმის გამო შველაძე მათ ფულს სძალავდა. „იყო შემთხვევბი, როდესაც გაკვეთილზე ვაგვიანებდი და თითო დაგვიანებაზე 50 თეთრს გვართმევდა ყველას. თვითონ ირმას გაკვეთილზე, ანუ როდესაც ქართული ენისა და ლიტერატურის საგანი გვქონდა, გვიჭირდა ქართულად გამართულად საუბარი, სიტყვების წარმოთქმა და ამ დროსაც თითო არასწორად წარმოთქმულ სიტყვაში 20-30 თეთრი უნდა გადაგვეხადა. ეს ჯარიმა იყო, თან გვემუქრებოდა, ატესტატს არ მოგცემთო, თქვენი ბედი ჩემს ხელშიაო“, – ამბობს გურბანოვი.

სკოლის მოსწავლეებმა მოძალადე მასწავლებლისგან დაცვა არასამთავრობო ორგანიზაციას სთხოვეს. ოცამდე მოსწავლემ განცხადება საკუთარი ინიციატივით დაწერა და დასახმარებლად „საქართველოს აზერბაიჯანელ სტუდენტთა ასოციაციას“ მიმართა. არასამთავრობო ორგანიზაციის წარმომადგენელმა , სამირა ისმაილოვამ ფაქტის შესწავლა განცხადების შესვლის დღიდანვე დაიწყო და როგორც თავად აცხადებს , დეტალებში ჩარრმავებით კიდევ უფრო მძიმე დანაშაულთან მიდის კვალი.

წყარო „პრაიმტაიმი“