„ერთს ყელი გამოაჭრეს და მეორეს აყურებინეს თუ არ მიიღებ მუსლიმანობას შენც გამოგჭრითო“

საზოგადოება - 17:59, 18 Apr, 2015

6941

„თვითონ არ ჰყავთ შვილები? თავებს, რომ აჭრიან ბავშვებს და ამწარებენ? ამაზე დიდი უბედურება რა არის? რა ვთქვათ?“-ამბობს ზინა სანაშვილი. ის სოფელ ქანდაში წლებია ასურელებთან ერთად ცხოვრობს. გვეუბნება, რომ ინტერნეტში გავრცელებულმა ვიდეო კადრებმა სადაც ასახულია თუ როგორ სასტიკად უსწორედებიან ტერორისტები ადამიანებს და მათ შორის მცირეწლოვან ბავშვებს მთელი სოფელი შოკში ჩააგდო.
სოფელში მეცხრამეტე საუკუნიდან დღემდე 2000-ზე მეტი ასურელი ქრისტიანი ცხოვრობს. მათი უმრავლესობა მზადაა ის ბავშვები შეიფარონ რომლებიც გავრცელებულ ვიდეო კადრებში დახმარებას ითხოვენ.
ქანდას სკოლის პედაგოგი თამარ ტატუნაშვილი „ნიუპოსტთან“ საუბრისას ამბობს, რომ თავადაც ასურელია და მისთვის ასურელების მიმართ ტერორისტების მიერ გამოჩენილი სისასტიკე განსაკუთრებით შოკისმომგვრელია, ტატუნაშვილი მზადაა სირიაში მცხოვრებ ასურელებს დახმარების ხელი გაუწოდოს.
ქართველი ასურელები მსოფლიოს სირიაში და ერაყში მომხდარ შოკისმომგვრელ ამბებზე რეაგირებას სთხოვენ.
„მეცამეტე საუკუნიდან, მეოცე საუკუნის ჩათვლით ასურელებმა სარწმუნოების გზაზე დაკარგეს 16 მილიონი ადამიანი, ისინი ტერორისტებმა დახოცეს. ასურელებმა მიიღეს პირველი ქრისტიანობა, ამის არ დანახვა, ამათი უპატრონოდ დატოვება, ეს არის კაცობრიობის დანაშაული“-ამბობს გრიშა ათანეზოვი.
„გენოციდი მოხდა ჩვენი ხალხის, არ დაინდეს არც ბავშვი, არც ქალი. ჯერ დაიწყო ბერების გატაცებით, ერთი წლის წინ. ორი ბერი გაიტაცეს, ერთს ყელი გამოაჭრეს და მეორეს აყურებინეს თუ არ მიიღებ მუსლიმანობას შენც გამოგჭრითო, რათქმაუნდა არ მიიღო და ისიც შეეწირა. მაშინ მსოფლიომ ხმა არ ამოღო და შერჩათ“-აცხადებს იური რუბანოვი.
ასურელები ითხოვენ საზოგადოებამ სოლიდარობის ნიშნად მაინც, მეტი ყურადღება დაუთმოს ახლო აღმოსავლეთში ქრისტიანების გენოციდს. მათი თქმით ახლაც ამ დროს ათასობით კაცი, ქალი, ბავშვი, მოხუცი თუ ახალგაზრდა საფრთხის წინაშეა.