სიცილის კარნავალი თბილისში - რა ელოდებათ დღესასწაულზე მისულ ადამიანებს

კულტურა - 19:30, 17 Apr, 2015

4328

ჟურნალისტმა დეა თავბერიძემ, რეჟისორმა ნინო მაღლაკელიძემ, ფსიქოლოგმა ხათუნა მუზაშვილმა და „სიცილის ლიდერმა“ ნინო შავდიამ სიცილის საერთაშორისო დღეს 3 მაისს, თბილისში დაგეგმილ ღონისძიებებთან დაკავშირებით ერთობლივი განცხადება გააკეთეს.
"3 მაისს მსოფლიო სიცილის დღეს აღნიშნავს. ჟურნალისტებმა გადავწყვიტეთ, რომ ამ საერთაშორისო დღეს საქართველოც შეუერთდეს და სიცილის დღე თბილისში კოსტიუმირებული საკარნავალო მსვლელობით გაიმართოს.
ეს იქნება საკარნავალო ხასიათის დღესასწაული - ჯამბაზებით, პანტომიმის მსახიობებით, მუსიკოსებით და ქუჩაში გამოსული საკარნავალოდ შემოსილი ხალხით. სიცილის კარნავალში ჩაერთვებიან სკოლის მოსწავლეები და სტუდენტები. სიცილზე გაიყიდება - გამაგრილებელი სასმელები, ტკბილეული, ფუნთუშები, სათამაშოები და საკარნავალო აქსესუარები, რომელსაც უსასყიდლოდ გადმოსცემენ სიცილის კარნავალში ჩართული პარტნიორი კომპანიები.
მობილიზებული იქნება სიცილის ფესტივალის მოხალისეთა ჯგუფები, რომლებიც ორგანიზებას გაუწევენ და იზრუნებენ საზოგადოების პოზიტიურ განწყობაზე. სპეციალურად ამ დღისთვის ინდოეთიდან ჩამოგვყვას მსოფლიოში აღიარებული სიცილის ლიდერი მაგნო (დათო) შავდია, რომელიც უკვე 20 წელია უცხოეთში ცხოვრობს და ამ სფეროში მოღვაწეობს. მაგნო სიცილის თერაპევტი და ინდოეთის ფერწერის სწავლების ხელმძღვანელი გახლავთ - ზედმეტსახელად მას სიცილით მკურნალს ეძახიან.
მაგნო შავდიას ყოველწლიურად იწვევენ უცხოეთის სხვა და სხვა ქვეყანაში სიცილის ტრეინინგების ჩასატარებლად. 3 მაისს მაგნო იზრუნებს ქართველი ხალხის სიცილზე. რადგან სიცილს აქვს გამაერთიანებელი პოზიტიური ენერგია, ამ დღის მნიშვნელობაც ეს არის, რომ სიცილის პოზიტიურმა ენერგიამ ჩაანაცვლოს საზოგადოებაში მოზღავებული ნეგატიური ენერგია და ოპტიმისტური განწყობა შეიტანოს ხალხში.
ვთხოვთ ყველას მხარდაჭერას ქვეყანასა და ხალხში პოზიტივის გასავრცელებლად" - ნათქვამია ორგანიზატორების განცხადებაში.
„თბილისის კარნავალის“ საინფორმაციო მხარდაჭერები: გაზეთი „პრაიმტაიმი“ , საინფორმაციო სააგენტო „ნიუპოსტი“, საინფორმაციო ანალიტიკური პორტალი „კვირა“, საიფორმაციო სააგენტოები: „პირველი“, „რეპორტიორი“, „ნიუსპრესი“, „tvfree”, ინტერნეტ ჟურნალი „ჟოლო“. რადიო „მაესტრო“, „gnnews.ge“, სატელევიზიო არხი Miusic Box"- აცხადებენ ღონისძიების ორგანიზატორები.