თბილისის მერი დავით ნარმანია დღეს ჰოლოკოსტის მსხვერპლთა ხსოვნისა და ევროპელ ებრაელთა გმირობისადმი მიძღვნილი ღონისძიებას დაესწრო.

ებრაულ მუზეუმში ნაჩვენები იყო იერუსალიმის მემორიალური მუზეუმის მიერ, ისრაელის სახლთან და საქართველოს განათლების სამინისტროსთან თანამშრომლობით გადაღებული დოკუმენტური ფილმი - „ქართველი შინდლერი“. შეხვედრაზე მოწვეულები იყვნენ ფილმის მთავარი გმირის - სერგი მეტრეველის ოჯახის წევრები.

თბილისის მერმა ღონისძიებაზე მოწვეულ სტუმრებს სიტყვით მიმართა. დავით ნარმანიას განცხადებით, ებრაელი და ქართველი ხალხის მეგობრობას მრავალსაუკუნოვანი ისტორია აქვს.

„თბილისში სათუთად ვინახავთ ქართველი და ებრაელი ხალხების მრავალსაუკუნოვანი მეგობრობის ყველა მაგალითს. გვეამაყება, რომ იყო ამქვეყნად „ქართველი შინდლერიც“ - სერგო მეტრეველი, რომელმაც მრავალი ებრაელი გადაარჩინა. ჩვენ, რა თქმა უნდა, ასევე ვაფასებთ სხვა ქვეყნების წვლილს ებრაელთა ხსნაში. შემთხვევითი არ არის, რომ ჰოლოკოსტის მსხვერპლთა გახსენება და ებრაული გმირობის აღნიშვნა ხვალ თურქეთის საელჩოში გაგრძელდება“ - განაცხადა დავით ნარმანიამ.

ღონისძიებას ესწრებოდნენ საქართველოს მთავრობის, ებრაული დიასპორის, ბიზნესისა და აკადემიური წრეების წარმომადგენლები.

ჰოლოკოსტის მსხვერპლთა ხსოვნისა და ევროპელ ებრაელთა გმირობისადმი მიძღვნილი ღონისძიებები 15-16 აპრილს თბილისში, ისრაელის სახლისა და საქართველო-ისრაელის ბიზნეს პალატის ორგანიზებით იმართება.

რუსუდან ქიმერიძე