საქსტატის ინფორმაციით, 2015 წლის მარტში 2015 წლის თებერვალთან შედარებით სამრეწველო პროდუქციის მწარმოებელთა ფასების ინდექსი 1,0 პროცენტით გაიზარდა. ინდექსი გაზრდილია 2014 წლის მარტთან შედარებით 7,2 პროცენტით და 2005 წლის საშუალოსთან შედარებით 74,4 პროცენტით.

2015 წლის მარტში წინა თვესთან შედარებით ინდექსის ფორმირებაზე ძირითადი გავლენა იქონია დამამუშავებელ მრეწველობაზე ფასების 0,8 პროცენტით ზრდამ, რაც ინდექსის პროცენტული ცვლილების საერთო მაჩვენებელზე 0,69 პროცენტული პუნქტით აისახა.

ფასები გაიზარდა საკვები პროდუქტებისა (სასმელების ჩათვლით) და თამბაქოს წარმოებაზე (2,3 პროცენტი) და ცელულოზა-ქაღალდის მრეწველობასა და საგამომცემლო საქმიანობაზე (4,7 პროცენტი). ამასთან, აღნიშნულ პერიოდში ფასები შემცირდა ქიმიურ წარმოებაზე (-4,3 პროცენტი) და მეტალურგიულ მრეწველობასა და ლითონის მზა ნაწარმის წარმოებაზე (-1,2 პროცენტი).

12-თვიან პერიოდში ინდექსის ფორმირებაზე ძირითადი გავლენა იქონია ფასების ცვლილებამ შემდეგ სექციებზე:

დამამუშავებელი მრეწველობა: ფასები გაიზარდა 9,3 პროცენტით და შესაბამისად, სექციის წვლილმა ინდექსის პროცენტული ცვლილების საერთო მაჩვენებელში 7,61 პროცენტული პუნქტი შეადგინა. აღნიშნულ პერიოდში ფასების ზრდა დაფიქსირდა საკვები პროდუქტებისა (სასმელების ჩათვლით) და თამბაქოს წარმოებაზე (16,5 პროცენტი), მეტალურგიულ მრეწველობასა და ლითონის მზა ნაწარმის წარმოებაზე (7,7 პროცენტი) და ცელულოზა-ქაღალდის მრეწველობასა და საგამომცემლო საქმიანობაზე (32,5 პროცენტი). ფასები 19,9 პროცენტით შემცირდა ქიმიურ წარმოებაზე.

ელექტროენერგიის, აირისა და წყლის წარმოება და განაწილება: ფასები შემცირდა 3,4 პროცენტით, რაც ინდექსის პროცენტული ცვლილების საერთო მაჩვენებელზე -0,44 პროცენტული პუნქტით აისახა.

ქვემოთ მოცემულ ცხრილში წარმოდგენილია სამრეწველო პროდუქციის მწარმოებელთა ფასების ინდექსი (წინა თვესთან და წინა წლის შესაბამის თვესთან შედარებით) და ინდექსის ფორმირებაში მონაწილე ქვეჯგუფების შესაბამისი წვლილები.