პეტიცია ლევან რამიშვილის მხარდასაჭერად - ჟურნალისტს პატიმრობა ემუქრება

საზოგადოება - 16:57, 13 Apr, 2015

4585

სოციალურ ქსლეში ვრცელდება პუბლიცისტის და ჟურნალისტის ლევან რამიშვილის მხარდასაჭერი პეტიცია, რომელსაც გარკვეული მიზეზების გამო პატიმრობა ემუქრება. პეტიციის ტექსტს ”ნიუპოსტი” უცვლელად გთავაზობთ:

”13 თებერვალს თბილისში დააკავეს ლევან რამიშვილი - ჟურნალისტი, პუბლიცისტი, მთარგმნელი, რუსთველოლოგი, აღმოსავლეთმცოდნე. მას წაუყენეს ბრალდება საქართველოს სისხლის სამართლის კოდექსის 260 მუხლის პირველი პრიმა ნაწილით. ძილის წამალში, რომელსაც იგი მოიხმარდა, აღმოაჩინეს ნივთიერება, რომელიც საქართველოს დღევანდელი კანონმდებლობით „აკრძალული ნივთიერებების“ ნუსხაშია შეტანილი.

წლების მანძილზე ლევან რამიშვილი მუშაობდა გაზეთ რეზონანსში და სხვა სერიოზულ მედია-გამოცემებში. მისი სტატიები ყოველთვის გამოირჩეოდა მახვილგონივრულობით და მაღალი მოქალაქეობრივი თვითშეგნებით. იგი ასევე დაკავებულია ლიტერატურული და სამეცნიერო საქმიანობით. ლევანი არის რამოდენიმე წიგნის ავტორი და პრემია „საბას“ ლაურეატი. მის ნამუშევრებსა და პროექტებს დიდი მნიშვნელობა აქვს ჩვენი ქვეყნის კულტურული ცხოვრებისათვის; რამოდენიმე მათგანზე ლევანი დღესაც აქტიურად მუშაობს.

აღნიშნულიდან გამომდინარე, გთხოვთ გამოიჩინოთ გულისხმიერება და იხელმძღვანელოთ კანონის ჰუმანურობის პრინციპების მაქსიმალური გათვალისწინებით!”- წერია პეტიციაში

მსურველებს აღნიშნულ პეტიციაზე ხელმოწერა შეუძლიათ ბმულზე