აფეთქების შედეგად დაზიანებული კორპუსის აღდგენითი სამუშაოები უახლოეს დღეებში დაიწყება

საზოგადოება - 14:36, 12 Apr, 2015

2273

გლდანის რაიონის გამგებლის ბესარიონ ქარცივაძის განცხადებით, დღეს დილით აფეთქების შედეგად დაზიანებული კორპუსის აღდგენითი სამუშაოები უახლოეს დღეებში დაიწყება,

გამგებლის თქმით, აფეთქების ტალღა იმდენად ძლიერი იყო, კორპუსის ზედა ნაწილი პრაქტიკულად მთლიანად დააზიანა. ქარცივაძე არ გამორიცხავს, რომ აღდგენითი სამუშაოების დასრულებამდე ობიექტიდან რამდენიმე ოჯახი გაიყვანონ.

"პირველ რიგში მოხდება კორპუსის დათვალიერება-შესწავლა. ერთი შეხედვით ობიექტი არის პრაქტიკულად მთლიანად დაზიანებული: დაზიანებულია ლიფტის შახტები, მეცხრე სართულზე მოცულობით მონაკვეთზე აღარ არის სინკარული გადახურვა, ის ჩამოიშალა. ასევე, მერვე-მეცხრე სართულის მარჯვენა ფლიგელი პრაქტიკულად მთლიანად დაზიანებულია. აფეთქების ტალღა იმდენად ძლიერი იყო, რომ არა მარტო ამ კორპუსში, არამედ ახლო მდებარე სხვა კორპუსების მობინადრეების ზოგიერთი საცხოვრებელი სახლის შუშებიც კი ჩაიმსხვრა. გამგეობა ახლა მოახდენს მარცხენა მხარის ფლიგელზე სინკარის დემონტაჟს, რადგან არსებობს მისი გადმონგრევის საფრთხე. ამასთან, უახლოეს დღებში მოხდება აღდგენითი სამუშაოების დაწყება. ყველა მობინადრესთან კონტაქტი გვაქვს და არ არის გამორიცხული, უსაფრთხოების მიზნით კორპუსიდან დროებით რამდენიმე ოჯახის გაყვანა მოხდეს", - განაცხადა ბესარიონ ქარცივაძემ.

გლდანის გამგებლის განმარტებით, ყველა ოჯახს ზარალი იმ ხარისხით აუნაზღაურდება, რა ზარალიც აფეთქების შედეგად მიიღო.

გლდანის მეორე მიკრორაიონში 25-ე კორპუსში აფეთქება დღეს დილით მოხდა. დაიღუპა ერთი ადამიანი. წინასწარი ინფორმაციით, აფეთქება ბუნებრივი აირის დაგროვებამ გამოიწვია.