,,შეუნდოს უფალმა... შვილი დამიობლა, მას ეს სასჯელიც ეყოფა“

,,შეუნდოს უფალმა... შვილი დამიობლა, მას ეს სასჯელიც ეყოფა“ - მოკლული პოლიციელის მეუღლე

საზოგადოება - 17:08, 10 Apr, 2015

15239

გარდაცვლილი პოლიციელის ბექა მარგიშვილის მეუღლე შალვა აბულაძის დაკავებას ეხმაურება და ამბობს, რომ მისი მეუღლე სულგრძელი ადამიანი იყო და მკვლელს აუცილებლად შეუნდობდა.
"ღმერთმა შეუნდოს, უფალმა შეუნდოს... გაგვამწარა ოჯახი, დამიობლა შვილი, მთელი ცხოვრება გამამწარა მე, მას ეს სასჯელიც ეყოფა", - აცხადებს მარგიშვილის მეუღლე.
შალბა აბულაძე დღეს ჩატარებული სპეცოპერაციის შედეგად ბორჯომში დააკავეს.

4 აპრილს, საღამოს საათებში, თბილისში, ვარკეთილის მეტროსთან, ჯავახეთის ქუჩაზე, შსს-ს ისანი-სამგორის სამმართველოს მე-8 განყოფილების უბნის ინსპექტორ-გამომძიებელი ბექა მარგიშვილი დეტექტივის თანაშემწე - გამომძიებელ ვალერიან გრძელიშვილთან ერთად სამსახურებრივ მოვალეობას ასრულებდა, რა დროსაც მათ გადამოწმების მიზნით პიროვნება შეაჩერეს. აღნიშნულმა პირმა მოულოდნელად პოლიციელების მისამართით ცეცხლსასროლი იარაღიდან ცეცხლი გახსნა და შემთხვევის ადგილიდან მიიმალა. სროლის შედეგად ორივე სამართალდამცველი დაიჭრა.

მიყენებული ჭრილობების შედეგად ბექა მარგიშვილი საუნივერსიტეტო კლინიკაში გადაყვანის შემდეგ გარდაიცვალა.

დამნაშავის ადგილსამყოფელის დასადგენად ამ დრომდე თბილისში და ბორჯომში ოპერატიულ-სამძებრო სამუშაოები მიმდინარეობს.