თბილისის მუნიციპალიტეტის მერი დავით ნარმანია და ჯანდაცვისა და სოციალური მომსახურების საქალაქო სამსახურის უფროსი გელა ჩივიაშვილი სამგორის რაიონის გამგებელთან მამუკა ჩოქურთან ერთად მოსკოვის გამზირზე მიუსაფართა დროებით თავშესაფარს ეწვივნენ, ბენეფიციარებს აღდგომის ბრწყინვალე დღესასწაული მიულოცეს და საჩუქრები გადასცეს.

სააღდგომო საჩუქრების გარდა, მიუსაფართა დროებით თავშესაფარს 100 პლედი, 100 ბალიში და 40 ორთოპედიული ლეიბი გადაეცა, საყოფაცხოვრებო ნივთებით მოძველებულის და დაზიანებულის ჩანაცვლება მოხდება, ნაწილი კი, რეზერვში დარჩება.

დავით ნარმანიას თქმით, თბილისის მერია ყოველდღიურად ზრუნავს ბინადართა ჯანმრთელობასა და საყოფაცხოვრებო პირობების გაუმჯობესებაზე. „სამგორის რაიონის ტერიტორიაზე უკვე შენდება და ზაფხულისთვის დასრულდება 240 ადგილიანი, საერთაშორისო სტანდარტების შესაბამისი თავშესაფრის მშენებლობა, სადაც პირობები გაცილებით უკეთესი იქნება. გარდა დროებით თავშესაფარში მყოფი ბენეფიციარებისა, საჭიროების შემთხვევაში, ახალი თავშესაფარი სხვა ბენეფიციარებსაც მიიღებს“ - განაცხადა თბილისის მერმა.

ჯანდაცვისა და სოციალური მომსახურების საქალაქო სამსახურის უფროსის გელა ჩივიაშვილის განცხადებით, თავშესაფარში სამედიცინო მოთხოვნების სრული დაცვით ტარდება სადერატიზაციო და სადეზინფექციო სამუშაოები. „ბენეფიციარები უზრუნველყოფილი არიან დღეში ორჯერადი კვებით, სრულყოფილი სამედიცინო მომსახურებით, ასევე, საჭიროების შემთხვევაში, მედიკამენტებით და გათბობით. ტერიტორიაზე ფუნქციონირებს საშხაპე მუდმივი ცხელი წყლით. ტერიტორიაზე მოწესრიგდა მიმდებარე ტერიტორია და გაკეთდა კაპიტალური ღობე“ - განაცხადა გელა ჩივიაშვილმა.

დღეისათვის მოსკოვის გამზირზე მდებარე მიუსაფართა დროებით თავშესაფარში 170 ბინადარია, მათგან 59 ქალია.