„ახალგაზრდა გოგო მორბოდა ტირილით“ ...

საზოგადოება - 17:44, 09 Apr, 2015

6329

„იმ დილის, იმ 9 აპრილის დილის ჩემი პირველი კადრები მაქვს“ - ჰყვება პოეტი ნინო სადღობელაშვილი და სოციალურ ქსელში თავის მოგონებას კადრებად ალაგებს.

„ახალგაზრდა გოგო მორბოდა ტირილით, სად იყო მაშინ პირდაპირი ეთერები, არც მობილური და მით უფრო ინტერნეტი, გარეუბანში მგონი სულაც იმ გოგომ მოიტანა პირველმა იმღამის ამბავი...
ყველა სათითაოდ აჩერებდა და ისაც ყვებოდა და ყვებოდა გაუთავებლად, სლუკუნით და, ბოლოს მამაჩემმა გააჩერა და რაც მოყვა, სულ ეგრე ცეცხლის შხეფებივით ისროდა სიტყვებს და ყველა სიტყვა მომხვდა: ალესილი ნიჩბები, მოწამლული გაზი, უსისხლ–ხორცო რუსი ჯარისკაცები...

კარგად არც მესმოდა ეს რა იყო და რას ნიშნავდა, მაგრამ მივხვდი რომ იმ დილით რაღაცდიდი დამთავრდა და არაფერი ისე აღარ იქნებოდა როგორც მანამდე, და ის კი, რაც იმ დილიდან იწყებოდა, სუსხის შეგრძნება იყო, მაცოცხლებელის და მტკივნეულის, და მერე მერე, როცა გვარიანადაც გავიზარდე და შევხედე იმდილის 9 აპრილს სულ სხვა თვალებით, როცა სამშობლოსთვის დაღვრილ სისხლსა და მსხვერპლში კიდევ სხვა მსხვერპლიც დავინახე _ უგუნურობის, სიკერპის, განუკითხაობის სისხლიანი შედეგი...
მერე უფრო შემიყვარდა ის წმინდა გულები, ვინც თავისი სიცოცხლით უანგაროდ შეეყუდა დროის ჯებირებს და ვისი სისხლის ფასადაც გადაირეცხა ეს ჯებირები...

ისინი იმაზე მაღლა დგანან თავიანთი სიკვდილით, ვიდრე ნებისმიერი საბრძოლო შეძახილი ვიდრე თავგანწირული ომის ყიჟინა, ვიდრე ჩაუმცხრალი კოცონი სამშობლოს თავისუფლების სახელით"...