იჩვენი ვალია, გავიხსენოთ და თაობებს გადავცეთ ქვეყნის დამოუკუდებლობას შეწირულთა ღირსება

იჩვენი ვალია, გავიხსენოთ და თაობებს გადავცეთ ქვეყნის დამოუკუდებლობას შეწირულთა ღირსება - ნარმანია

საზოგადოება - 14:07, 09 Apr, 2015

1186

თბილისის მერმა დავით ნარმანიამ და დედაქალაქის მთავრობის წევრებმა 1989 წლის 9 აპრილს დაღუპულთა ხსოვნას პატივი მიაგეს.

დავით ნარმანიამ და მთავრობის წევრებმა რუსთაველის გამზირზე 9 აპრილს დაღუპულთა მემორიალი გვირგვინით და ყვავილებით შეამკეს.

თბილისის მერის განცხადებით, თითოეული ჩვენგანის ვალია, გავიხსენოთ 9 აპრილს დაღუპულები და პატივი მივაგოთ მათ ხსოვნას.

"26 წელი გავიდა იმ დიდი ტრაგედიიდან, რაც დავკარგეთ ღირსეული მამულიშვილები, ჩვენი ქვეყნის ღირსეული შვილები. მაგრამ მიუხედავად იმისა, რაც უფრო მეტი დრო გადის, იმ ადამიანების რიცხვი, ვინც პატივს მიაგებს მათ ხსოვნას, არ მცირდება. ყოველთვის ღირსეულად ვიხსენებთ ამ ადამიანებს. მათი ქვეყნისადმი სიყვარული შემდგომში იქცა მაგალითად და სიმბოლოდ იმისა, თუ როგორ შეიძლება დავიცვათ საკუთარი ქვეყანა ძალადობისგან, აგრესორისგან. თითოეული ჩვენგანის ვალია, რა დროც არ უნდა გავიდეს, გავიხსენოთ ისინი და გადავცეთ მომავალ თაობას, თუ რაოდენ ღირსეული ადამიანები იყვნენ ისინი, ვინც ჩვენი ქვეყნის დამოუკუდებლობას თავი შეწირა", - განაცხადა დავით ნარმანიამ.

1989 წლის 9 აპრილს საქართველოს დამოუკიდებლობის მოთხოვნით გამართული მშვიდობიანი დემონსტრაციის დარბევის შედეგად 21 ადამიანი, მათ შორის 14 ქალი დაიღუპა, ასობით დაიჭრა და მხუთავი აირით მოიწამლა.