ექსკლუზივი: "მსგავსი ჭორების გავრცელება "ნაციონალების" ხელწერაა"- რას ამბობს ჟუჟუნა ვაზაგაშვილი

საზოგადოება - 13:54, 09 Apr, 2015

3380

გია სოსანაშვილის ადვოკატის მიერ გავრცელებულ ინფორმაციას, იმასთან დაკავშირებით, რომ იური ვაზაგაშვილს მადინა მელაძესთან ინტიმური კავშირი ქონდა და შესაძლოა ეჭვიანობის გამო იქნა მოკლული, იური ვაზაგაშვილის და ჟუჟუნა ვაზაგაშვილი გამოეხმაურა.

როგორც ჟუჟუნა ვაზაგაშვილი „ნიუპოსტთან“ საუბარში აცხადებს, მსგავსი ჭორების გავრცელება "ნაციონალების" ხელწერაა. ჟუჟუნა ვაზაგაშვილის თქმით „ნაციონალებმა“ მის ძმას ჯერ ნარკოტიკების რეალიზატორობა დააბრალეს, ახლა კი მსგავსი ჭორი მოუგონეს.

სოსანაშვილის ადვოკატის მიერ გავრცელებულ ინფორმაცია, იური ვაზაგაშვილისა და მადინა მელაძის ინტიმური ურთიერთობის შესახებ, "ნიუპოსტთან" ექსკლუზიურ ინტერვიუში თავად მადინა მელაძემაც უარყო.

შეგახსენებთ, იური ვაზაგაშვილის მკვლელობაში ბრალდებულის გია სოსანაშვილის ადვოკატის სოსო ჯოგლიძის განცხადებით, შესაძლოა მკვლელობა ეჭვიანობის ნიადაგზე მოხდა.

„შესაძლებელია ვაზაგაშვილის გარდაცვალების ფაქტი ეჭვიანობის ნიადაგზე მომხდარიყო. როგორც გია სოსანაშვილმა მითხრა, გარდაცვლილი ვაზაგაშვილი დადიოდა მელაძეების რძალთან, ვის გასვენებაშიც აპირებდა წასვლას, იმ მელაძეებს ვგულისხმობ. ამ ქალს მადინა ჰქვია, ამის შესახებ მთელმა სოფელმა იცოდა. შემდეგ ოჯახებს ამის გამო კონფლიქტიც მოსვლიათ და იური ვაზაგაშვილს ქალბატონის ქმრისთვის „ნივა“ უჩუქებია, რომ გაჩუმებულიყო. არ არის გამორიცხული ამ ხალხმა მოაწყო ეს ყველაფერი, რადგან თავზე ლაფდასხმული დადიოდა ეს კაცი. ამ კაცის ძმები სხვა სოფლებში არიან გადასულები, ამ ამბის გამო იქ არ ჩერდებიან. ამ ყველაფერს ჩემი დაცვის ქვეშ მყოფი ახსნა-განმარტებაში ჰყვება“, - განაცხადა სოსო ჯოგლიძემ.

იური ვაზაგაშვილი შვილის საფლავზე აფეთქების შედეგად 20 იანვარს გარდაიცვალა. საქმეზე დაკავებულია ყოფილი სამართალდამცველი გია სოსანაშვილი. ფაქტზე გამოძიება 109-ე მუხლით მიმდინარეობს, რაც დამამძიმებელ გარემოებებში განზრახ მკვლელობას გულისხმობს.