თბილისში მუნიციპალური ტრანსპორტის თანამშრომლები შესაძლოა სააღდგომოდ გაიფიცონ.

თბილისის სატრანსპორტო კომპანიაში დასაქმებული ყვითელი ავტობუსის მძღოლები, მეტროს თანამშრომლები და ტრანსპორტის პროფკავშირის წარმომადგენლები საქართველოს პროფკავშირების გაერთიანების ეზოში შეიკრიბნენ და პრემიებთან დაკავშირებით დედაქალაქის ხელმძღვანელობის პოლიტიკა გააპროტესტეს. მათი თქმით სატრანსპორტო კომპანიებში დასაქმებულ პირებს სააღდგომო პერიოდში საგანგებო რეჟიმში უწევთ მუშაობა, თუმცა მერიისა და საკრებულოს თანამშრომლებისგან განსხვავებით მათი პრემიის რაოდენობა გაცილებით მცირეა.

მოსალოდნელი გაფიცვის შესახებ განცხადება თბილისის მეტროპოლიტენის მუშაკთა პროფესიული კავშირის წარმომადგენელმა გიორგი ხიტალიშვილი გააკეთა.
„თუ დღის ბოლომდე დავა მოლაპარაკებებით არ გადაწყდება, სატრანსპორტო კომპანიებში დასაქმებული პირები კონსტიტუციით მინიჭებულ უფლებას მიმართავენ, რომელთა შორის უკიდურესი ფორმა შეიძლება, გაფიცვა იყოს“, - განაცხადა ხიტალიშვილმა.

ტრანსპორტისა და გზების პროფესიული კავშირის თავმჯდომარის ლავრენტი ალანიას თქმით, მერიისა და საკრებულოს თანამშრომლებს სააღდგომო პრემიის სახით ხელფასის 80%-ის ოდენობით თანხა დაერიცხათ, სატრანსპორტო კომპანიებში დასაქმებულ ადამიანებს კი მხოლოდ 100 ლარი.

„ეს დაცინვაა და თუ მერია თვის ბოლომდე სატრანსპორტო კომპანიაში დასაქმებულ პირებს პრემიას არ გაუზრდის, შედეგებზე პასუხისმგებლობა მერიას ეკისრება, სატრანსპორტო კომპანიებში დასაქმებულებს მონური შრომა უწევთ; ავტობუსებში წყალი ჩადის; მე-13 ხელფასს ბრძოლით მივაღწიეთ; მხოლოდ სამ კომპანის დაერიცხა ხელფასის 80%-ის ოდენობის პრემია, რაც უსამართლობაა. პრემია ყველა კომპანიას თანაბრად უნდა ჰქონდეს“.- აღნიშნა ალანიამ.