საყდრისის შეუსწავლელი ნაწილი ააფეთქეს... გორა ფაქტიურად აღარ არსებობს

საზოგადოება - 17:42, 07 Apr, 2015

1569

საყდრისის გადარჩენის კომიტეტის წევრის ანა მიქაუტაძის განცხადებით, საყდრისის დანაღმვა რამდენიმე დღის წინ მოხდა. როგორც მიქაუტაძე "ნიუპოსტთან" საუბარში აცხადებს საყდრისის საკითხზე საზოგადოების მათ შორის ვერც დეპუტატების კონსოლიდაცია ვერ მოხერხდა, რათა ისინი სიტუაციის გასაცნობად ადგილზე მისულიყვნენ, მისი თქმით მიზეზით გახდა ის, რომ სხვადასხვა შეხედულების მქონე დეპუტატებს საყდრისზე ერთად მისვლა არ სურდათ.

„ჩვენი კომიტეტის წევრები იყვნენ მისულები საყდრისის ტერიტორიაზე და გადაიღეს სურათები. მათ ადგილობრივი მაცხოვრებლები ეუბნებოდენ, რომ ხდებოდა ტერიტორიის დანაღმვა, რასაც წინ უძღოდა მცირე აფეთქებები. იწყებოდა სამუშაოების ჩატარება უკვე იმ ნაწილში, რომელიც არ არის შესწავლილი. იქ იყო ოთხი გვირაბი, რომელთაგან მხოლოდ ერთი იყო შესწავლილი, დაუნაღმიათ უკვე შეუსწავლელი ნაწილი და ვიცოდით რომ აფეთქება მოხდებოდა. გულდასაწყვეტი არის ის, რომ ვერ მოხერხდა ხალხის კონსოლიდაცია, ჩვენ გვინდოდა ადგილზე დეპუტატების ჩაყვანა, მაგრამ სხვადასხვა გუნდში მყოფი დეპუტატები ადგილზე ერთად მისვლაზე უარს აცხადებდენ, მოხდა ისე, რომ გავიდა დრო და ააფეთქეს უკვე შეუსწავლელი ნაწილი. აღშფოთებულები ვართ ამის გამო და უკვე აღარ ვიცით რა გავაკეთოთ. გორა ფაქტიურად აღარ არსებობს, ძირში არიან ჩასულები და მიმდინარეობს სამუშაოები. მათ დაარღვიეს კონსტიტუციის 34-ე მუხლი“,-განაცხადა ანა მიქაუტაძემ.