ექსკლუზივი: 2500 დოლარად შეძენილი ნახატი და გამქრალი მყიდველი

საზოგადოება - 12:53, 07 Apr, 2015

13394

მშრალ ხიდთან, დედაენის ბაღში Tbilisi Flea Market-ზე ახალგაზრდა ხელოვანებმა კვლავ განაახლეს თავიანთი ხელნაკეთი ნივთებისა და ნახატების გაყიდვა. ბაზრობას ილიაუნის ყოფილი დეკანი გიორგი თუმანიშვილიც თავისი ნამუშევრებით ეწვია. ხელოვანმა რამდენიმე ტილოს გაყიდვაც შეძლო და „ნიუპოსტს“ ერთი ნახატის საინტერესო ისტორიაც მოუთხრო.

გიორგი თუმანიშვილი: flea market-ს პირველად მივიღე მონაწილეობა. ორი ტილოც გავყიდეთ. ტილოს გაყიდვას სასიამოვნო და თან ძალიან უცნაური შეგრძნებები ახლავს თან. ერთის მხრივ გიხარია, რომ სხვა ადამიანს მოსწონს შენი შემოქმედება თან ისე, რომ ამაში ფულს იხდის და არც ისე იაფს, ხოლო მეორეს მხრივ, თითქოს შენ ნაწილს ყიდი... რთული ასახსნელია მოკლედ. მე ხატვის ტექნიკა არ მაქვს. არსად მისწავლია ფერწერა. ტილოებზე გადმომაქვს ჩემი ემოციური სამყარო, განცდები, შეგრძნებები, სურვილები. ვცდილობ ეს ყოველივე ფერში ავსახო.

-დღეს პირველად გაყიდეთ ნახატი?
-ეს არ არის პირველი შემთხვევა, როდესაც ჩემი ტილო გაიყიდა. პირველი შემთხვევა იყო დაახლოებით ერთი წლის წინ, როდესაც ჩემ სამუშაო კაბინეტში კონსულტაციაზე მოვიდა ქალბატონი, მას ახლდა მეგობარი, რომელსაც მოეწონა ახლადდასრულებული ტილო მოლბერტზე, ზეთი ჯერ გამშრალიც კი არ იყო. იკითხა, - ამას ხომ არ ყიდითო? ვუთხარი, შეიძლება, რატომაც არა-მეთქი. ფასი მკითხა, არ ვიცი თქო, 2500 დოლარს გადაგიხდიო. თვალები გამიფართოვდა. ბუნებრივია დავთანხმდი...შევთანხმდით რომ ტილო, როდესაც გაშრებოდა წაიღებდა. თანხა იმავე დღეს დატოვა.ამის შემდეგ ის ქალბატონი არ მინახავს, არც საკონტაქტო ინფორმაცია მაქვს მის შესახებ, ხოლო ტილო, რომელიც მან იყიდა ისევ მე მაქვს.