უპატრონო ცხოველთა საერთაშორისო დღესთან დაკავშრებით, თბილისში - რუსთაველის მეტროს მიმდებარე ტერიტორიაზე საქართველოს ცხოველთა დაცვის საზოგადოების წარმომადგენლებმა და მოქალაქეებმა აქცია გამართეს.

აქციის მონაწილეებმა საკრებულოს ინიციატივა გააპროტესტეს, რომელიც კანონში ცვლილებების შეტანას და შინაური ცხოველების მეპატრონეებისათვის რეგულაციების დაწესებას ითვალისწინებს.

ცხოველთა უფლებების დამცველი ორგანიზაციებისა და მოქალაქეების აქცია, რომელიც რუსთაველის მეტროს მიმდებარე ტერიტორიიდან დაიწყო საკრებულოს შენობამდე მსვლელობით გაგრძელდა.

აქციის ერთ-ერთი ორგანიზატორის, სრულიად საქართველოს ცხოველთა დაცვის საზოგადოების თავმჯდომარის, ვახტანგ მამალაძის განცხადებით, საზოგადოება უნდა იყოს ჰუმანური და კეთილგანწყობილი ცხოველების მიმართ.

„მკაცრად უნდა განისაზღვროს, რა უფრო მნიშვნელოვანია მუნიციპალური თავშესაფრისთვის, ეუთანაზია, თუ ძაღლების პოპულაციის სხვა მეთოდებით მართვა, სტერილიზაცია/კასტრაცია. ეს პუნქტები კარგად გაწერილი უნდა იყოს რა ბედი ეწევა ცხოველს თავშესაფარში 10 დღის შემდეგ. გარდა ამისა, მუნიციპალურმა თავშესაფარმა და მერიამ უნდა უზრუნველყოს აგიტაცია-პროპაგანდა, რათა თავშესაფარში განთავსებული ცხოველის გასხვისება გაიოლდეს", - აღნიშნა ვახტანგ მამალაძემ.

როგორც ცნობილია, აქციის მონაწილეებმა შეადგინეს პეტიცია, რომელსაც საკრებულოში წარადგენენ.