„არემჯი კოპერის“ თანამშრომლებმა ქუთაისის აქციასთან საპროტესტო აქცია გამართეს. როგორც აქციის მონაწილეებმა განაცხადეს, წარმოების გაჩერების უფლებას არავის მისცემენ.

ისინი საყდრისში სამუშაოების განახლებას ითხოვენ.

აქციაზე შეკრებილები არ იზიარებენ იმ დეპუტატების პოზიციას, ვინც საყდრისთან დაკავშირებით საგამოძიებო კომისიის შექმნას ითხოვს. პარლამენტის შენობასთან შეკრებილებმა „რუსთავი2“-ის ჟურნალისტს სიტყვიერი შეურაცხყოფა მიაყენეს და განაცხადეს, რომ ტელეკომპანია ცრუ ინფორმაცია ავრცელებს.

„რუსთავი2“-თან საუბარს არ ვაპირებთ. რატომ? არ არის თქვენი საქმე“, - განაცხადეს აქციაზე შეკრებილებმა.

კომპანიის თანამშრომლის კახა კეკელიას განცხადებით, საბადოს თანამშრომლები ქუთაისში იმისთვის ჩავიდნენ, რომ გაარკვიონ რა სურთ „თავისუფალ დემოკრატებსა" და "ნაციონალურ მოძრაობას“.

კეკლიძის თქმით, ამ მოწვევის პარლამენტში გარკვეული ჯგუფები არიან „ნაციონალური მოძრაობის“ სახით, რომლებიც "მადნეულის", როგორც კომპანიის დისკრედიტაციას ეწევიან და მის შეფერხებას ცდილობენ.

„ვფიქრობთ, რომ ამისთვის ისინი გარკვეულ ფინანსურ რესურსებს და დაქირავებულ ძალებს იყენებენ, რომელსაც საყდრისის გადარჩენის კომიტეტს ეძახიან, რათა საზოგადოებაში დანერგონ აზრი, რომ კომპანია ისეთ სამუშაოებს აწარმოებს, რისი უფლებაც არ აქვს. კომპანია 1975 წლიდან მუშაობს, თან ძალიან წარმატებულად. ის საექსპორტო პროდუქციის დაახლოებით 6%-ს აწარმოებს და ეს ჯგუფები ცდილობენ წარმოება შეაფერხონ და შეიძლება მისი გაჩერებაც უნდათ. ასე ცდილობენ ისინი სოციალური ფონის დაძაბვას და იბრძვიან თავისი შორს გამიზნული მიზნებისთვის. მინდა ვთქვა, რომ წარმოებას ვერავინ გააჩერებს“, - განაცხადა კახა კეკელიძემ.

კომპანიის თანამშრომელმა გია მუშკუდიანმა აღნიშნა, რომ მათ ყველაზე კარგად იციან საყდრისი კულტურული ძეგლი იყო, თუ სხვა რამ.

„რომელ კომისიაზეა საუბარი, ან რატომ შეჰყავთ ამდენი ხალხი შეცდომაში. ჩვენზე უკეთესად ვინმემ იცის იქ რა იყო?! იქ იყო ერთი ბორცვი, რომელსაც ორი ნაპრალი ჰქონდა, ამ ნაპრალს გადააყოლეს მთელი საქართველო. მოვიდნენ, დაგველაპარაკონ, გაგვცენ პასუხები. უმუშევრობას უმუშევრობა უნდა დავამატოთ კიდევ?!" - განაცხადა მუშკუდიანმა.